კრება (24.06.07), და შედეგები პარამეტრები

[კანონისტი]

მეგობრებო,

როგორც იცით, უწმიდესის კურთხევით რეგისტრაცია გაიარა ჩვენმა ორგანიზაციამ

24 ივნისს, კვირას, 15:00 საათზე, წმ. სამების საპატრიარქო ტაძრის ახალგაზრდულ ცენტრში იგეგმება გაერთიანებული კრება. გთხოვთ, მაქსიმალურად ყველანი მოხვიდეთ

ამასთან, ერთად შევიმუშავოთ დღის წესრიგი. რა საკითხები განვიხილოთ? მე უკვე მოფიქრებული მაქვს რაღაც-რაღაცეები და ხვალ დავდებ

[კანონისტი]

ახალგაზრდა მართლმადიდებელთა გაერთიანების
II სხდომის
ო ქ მ ი

ქ. თბილისი, სამების საპატრიარქო ლავრა
2007 წლის 24 ივნისი


I. წევრების მიღების საკითხი
____________________________

აღინიშნა, რომ იმის გათვალისწინებით, რომ ზოგიერთ ფორუმელს შეიძლება არ სურს გაერთიანების წევრობა, ამასთან არიან წევრობის ისეთი მსურველებიც, რომლებსაც ინტერნეტზე ხელი არ მიუწვდებათ, სასურველია გაერთიანებაში გაწევრიანება მოხდეს ცალკე. აღინიშნა ისიც, რომ საიმისოდ, რათა წევრობის ყველა მსურველს სრული წარმოდგენა ჰქონდეს გაერთიანების საქმინობის შესახებ, გაერთიანების მიზნები განთავსდეს მართლმადიდებლურ ფორუმ church.ge-ს შესაბამის განყოფილებაში და მომზადდეს მცირე ბუკლეტები. დაისვა გაერთიანების წესდების შემუშავების საკითხიც. განხილულ იქნა გაერთიანების დაფინანსების პრობლემა

1. დაევალოს გაერთიანების თავმჯდომარეს დ. ჩიკვაიძეს 2 (ორი) კვირის ვადაში შეიმუშავოს საწევრო-სარეგისტრაციო ფორმა
2. დაევალოს საორგანიზაციო მიმართულების ხელმძღვანელს ბ. შუხოშვილს უზრუნველყოს შავ-თეთრი ბუკლეტების მომზადება
3. დაევალოს იურიდიული მიმართულების ხელმძღვანელს ივ. პეტრიაშვილს სექტემბრამდე შეიმუშავოს გაერთიანების წესდება
4. დაევალოს გაწევრიანების ყველა მსურველს უზრუნველყოს გაერთიანების შესახებ ინფორმაციის გავრცელება ახალი წევრების მიღების მიზნით
5. მიღებულ იქნეს ცნობად, რომ გაწევრიანების პროცესის დაწყების შემდეგ დღის წესრიგში დადგება ფილიალების საკითხი, უპირველესად კი ბათუმის ფილიალის
6. საწევრო შენატანების საკითხი შეუთანხმებლობის გამო გადადებულ იქნეს შემდგომი სხდომისათვის

II. სკოლაში საღვთო სჯულის სწავლების საკითხი და არსებული მდგომარეობა
__________________________________________________________________

აღნიშნა, რომ კონსტიტუციური შეთანხმებისა და "ზოგადი განათლების შესახებ" საქართველოს კანონის თანახმად, საღვთო სჯულის სწავლება საჯარო სკოლებში ნებაყოფილობითია, თუმცა ეს უფლება, როგორც წესი, რეალიზებული არ არის. მისი ყოვლადუსამღვდელოესობის, ცაგერისა და ლენტეხის ეპისკოპოს სტეფანესაგან (კალაიჯიშვილი) მიღებულია ლოცვა-კურთხევა, რომ მომზადდეს საინფორმაციო ხასიათის ინსტრუქცია, რომელიც დარიგდება სკოლებში საიმისოდ, რომ სკოლების სამეურვეო საბჭოებს სრული ინფორმაცია ჰქონდეთ აღნიშნული უფლების რეალიზაციის საშუალებების თაობაზე

1. დაევალოს იურიდიული მიმართულების ხელმძღვანელს ივ. პეტრიაშვილს განათლების მიმართულების ხელმძღვანელ ნ. განაიასთან ერთად 2007-2008 სასწავლო წლის დაწყებამდე შეიმუშავოს საღვთო სჯულის სწავლების შემოღების თაობაზე ინსტრუქცია
2. ცნობად იქნეს მიღებული, რომ კანონმდებლობის შესაბამისად სოციალური რეკლამა უფასოა სსმ-ის ეთერში და შესაძლებელია დამატებით იქნეს განხილული აღნიშნული ინსტრუქციის თაობაზე საზოგადოების ინფორმირება ტელევიზიის ეთერით

III. ქცევის კოდექსთან დაკავშირებული საკითხები
____________________________________________

"მაუწყებელთა ქცევის კოდექსი"-ს ის ვარიანტი, რომელსაც ამჟამად განიხილავს კომუნიკაციების მარეგულირებელი კომისია უარყოფილია საქართველოს საპატრიარქოს მიერ. აღინიშნა, რომ გაერთიანება ხელმომწერია "ზნეობრივი საქართველოსათვის" კოალიციის მიერ შემუშავებული საპროტესტო განცხადებისა

1. ცნობად იქნეს მიღებული გაერთიანების თავმჯდომარის დ. ჩიკვაიძის მოხსენება "ქცევის კოდექსთან" დაკავშირებით
2. ეთხოვოთ დამსწრეებს აქტიურად ჩაერთონ კოდექსის განხილვის პროცესში


IV. ზნეობრიობის მხარდაჭერა საპატრიარქოს ახალგაზრდულ ცენტრთან ერთად
___________________________________________________________________

აღინიშნა, რომ საპატრიარქოს ახალგაზრდული ცენტრი გეგმავს სხვადასხვა ღონისძიებებს ზნეობრიობის მხარდაჭერის მიზნით, სადაც სასურველია ჩაერთოს გაერთიანებაც

1. ცნობად იქნეს მიღებული გაერთიანების თავმჯდომარის დ. ჩიკვაიძის მოხსენება ზნეობრიობის მხარდამჭერ ღონისძიებათა თაობაზე
2. ეთხოვოთ დამსწრეებს აქტიურად ჩაერთონ ამ პროცესში


V. სამეცნიერო მუშაობის საკითხები და მათი მიმართულებები
_____________________________________________________

საგანგებოდ აღინიშნა, რომ გაერთიანების დასაფუძნებლად მისი უწმიდესობის ლოცვა-კურთხევა უპირველესად სამეცნიერო საქმიანობის წახალისებას შეეხებოდა. სასურველია, რომ გაერთიანებამ ფართო სპექტრი მოიცვას და უზრუნველყოს ახალგაზრდობის ჩართვა სამეცნიერო საქმიანობაში, წახალისებულ იქნეს კონფერენციები, სემინარები და სხვა მსგავსი ტიპის ღონისძიებები

1. დაევალოს საორგანიზაციო მიმართულების ხელმძღვანელს ბ. შუხოშვილს უზრუნველყოს სრულიად საქართველოს კათოლიკოს-პატრიარქის საერთაშორისო ფონდში დააზუსტოს სამეცნიერო საქმიანობის დაფინანსების საკითხები
2. დაევალოს სამეცნიერო მიმართულების ხელმძღვანელს ი. ჭიღლაძეს 30 სექტემბრამდე განსაზღვროს კონკრეტული პროექტები და კონფერენციები, რომელთა ორგანიზების თაობაზეც გაერთიანება იმსჯელებს შემდგომში
3. ეთხოვოთ დამსწრეებს სრული ინფორმირება მათთვის ხელმისაწვდომ პირთა წრეში გაერთიანების სამეცნიერო საქმიანობის თაობაზე
4. მიღებულ იქნეს ცნობად, რომ წარმატებული თემები და პროექტები წახალისებული იქნება გაერთიანების მიერ


VI. მართლმადიდებლურ ფორუმ church.ge-ს იუბილესთან დაკავშირებული საკითხები
_________________________________________________________________________

აღინიშნა, რომ მ/წლის 23 ივლისს არის მართლმადიდებლურ ფორუმ church.ge-ს იუბილე. მისი ყოვლადუსამღვდელოესობის, ცაგერისა და ლენტეხის ეპისკოპოს სტეფანესაგან (კალაიჯიშვილი) მიღებულია ლოცვა-კურთხევა იუბილეს სამების საპატრიარქო ლავრის ახალგაზრდულ ცენტრში. აღინიშნა ისიც, რომ გაერთიანება აქტიურად უნდა ჩაერთოს ღონისძიების ორგანიზების საქმეში

1. დაევალოთ საორგანიზაციო მიმართულების ხელმძღვანელ ბ. შუხოშვილსა და კულტურისა და ფოლკლორის მიმართულების ხელმძღვანელ ა. მიქაბერიძეს ფორუმის ადმინისტრაციასთან თანამშრომლობით უზრუნველყონ გაერთიანების მონაწილეობა ფორუმის იუბილეში
2. დაევალოს გაერთიანების თავმჯდომარეს დ. ჩიკვაიძეს საქართველოს უმაღლესი საერო და სასულიერო ხელისუფლების წარმომადგენელთა მოწვევა აღნიშნულ იუბილეზე
3. ცნობად იქნეს მიღებული, რომ საიუბილეო ღონისძიების დეტალები დამატებითი კონსულტაციების საფუძველზე გადაწყდება
4. ცნობად იქნეს მიღებული, რომ იუბილესათვის მზად იქნება ფორუმის მაისურები


VII. გაერთიანების ანსამბლის წევრობის საკითხი
___________________________________________

მოხსნილია განხილვიდან


დავით ჩიკვაიძე,
ახალგაზრდა მართლმადიდებელთა გაერთიანების
თავმჯდომარე