იოანე ოქროპირის ლიტურგია, ტექსტი პარამეტრები

[კანუდოსელი]

მინდა შემოგთავაზოთ ასეთი იდეა - თემა:

აქ ავკრიფოთ (და არა დავასკანეროთ ან დავაკოპიროთ) იოანე ოქროპირის ლიტურგიის სრული ტექსტი მხედრულად. ახლა თან არ მაქვს და მოგვიანებით დავდებ, თუ ვინმეს ამ მომენტში ხელი მიუწვდება კარგი იქნება თუ დაიწყებს და მერე მომდევნო შემომსვლელი გააგრძელებს

აუცილებელია წესი იყოს საერთო: ანუ

1. მღვდლის საიდუმლო ლოცვები დაიწეროს შავად, დანარჩენი ჩვეულებრივი სიმუქის
2. ძირითადი სათაურები-კომენტრები დაიწეროს იტალიკით, ანუ დახრილად.
3. ასევე იტალიკით დაიწეროს (ესეც კომენტარის ნაწილია, მაგრამ ცალკე გამოვყოფ) თუ ვინ წარმოთქვამს ამა თუ იმ ლოცვას, მაგალითად ასე: გუნდი, ან მღვდელი
4. არანაირი კოპირება...ვკრეფთ ხელით
5. უნდა ვიცოდეთ, ვინ რომელი გამოცემიდან დებს ტექსტს (მე ვდებ ტექსტს მარტყოფის ივერიის ღვთისმშობლის დედათა მონასტრის მიერ 2004 წელს გამოცემული "ღამისთევის ლოცვა, ლიტურღია" - წიგნის მიხედვით)
6. დაცული უნდა იყოს ძველი ქართულის ორთოგრაფია, შეძლებისდაგვარად უნდა გასწორდეს თანამედროვე გამოცემებში არსებული შეცდომები.
7. ყურადღება უნდა მიექცეს პუნქტუაციას, რადგან მისი არეულობის გამო ხშირად ლოცვის ტექსტი ბუნდოვანი ხდება.

პ.ს.
არანაირი ოფტოპიკები და საერთოდ არანაირი საუბარი, ვინმე თუ შემოვა, აკრიფოს მხოლოდ ტექსტი ლიტურგიისა
პ.პ.ს.
იმედია მარტო მე არ მომიწევს აკრეფა
მადლობა ცქნაფოს იდეის არაპირდაპირი გზით მოწოდებისთვის...
სოტირისს მადლობა რჩევისათვის
პარტიული მადლობა კანონისტს და ათოსს
წაშალეთ ოფტოპიკები

[მარიამი]

წარდგომანი და ალილუიანი შვიდეულის დღისანი:

ორშაბათი, ხმა მე-4: რომელმან შეჰქმნა ანგელოსნი მისნი სულად, და მსახურნი მისნი - ალად ცეცხლისა.
მუხლი: აკურთხევს, სული ჩემი, უფალსა, უფალო ღმერთო ჩემო, განსდიდენ ფრიად.
ალილუია, ხმა მე-5: აქებდით უფალსა, ყოველნი ანგელოსნი მისნი, აქებდით მას ყოველნი ძალნი მისნი.
მუხლი: რამეთუ მან სთქუა, და იქმნეს: თავადმა ბრძანა, და დაებადნეს.

სამშაბათი, ხმა მე-7: იხარებდეს მართალი უფლისა მიმართ და ესვიდეს მას.
მუხლი: შეისმინე, ღმერთო, ხმისა ჩემისა, გევედრებოდე რა მე შენდამი.
ალილუია, ხმა მე-4: მართალი ვითარცა ფინიკი აღყვავდეს, და ვითარცა ნაძვი ლიბანისა განმრავლდეს.
მუხლი: დანერგულნი სახლსა შინა უფლისასა, ეზოთა შინა სახლისა ღვთისა ჩვენისათა ყვაოდიან.

ოთხშაბათი, ხმა მე-3 - გალობა ღვთისმშობლისა: ადიდებს სული ჩემი უფალსა და განიხარა სულმან ჩემმან ღვთისა მიმართ მაცხოვრისა ჩემისა.
მუხლი: რამეთუ მოხედნა სიმდაბლესა ზედა მხევლისა თვისისა, რამეთუ აჰა ესერა ამიერითგან მნატრიდენ მე ყოველნი ნათესავნი.
ალილუია: ხმა მე-8: ისმინე, ასულო, და იხილე, და მოყავ ყური შენი.
მუხლი: პირსა შენსა ლიტანიობდენ მდიდარნი ერისანნი.

ხუთშაბათი, ხმა მე-8: ყოველსა ქვეყანასა განხდა ხმა მათი, და კიდეთა სოფლისათა სიტყვანი მათნი.
მუხლი: ცანი უთხრობენ დიდებასა ღვთისასა და ქმნულსა ხელთა მისთასა მიუთხრობს სამყარო.
ალილუია, ხმა 1-ლი: აღიარებენ ცანი საკვირველებათა შენთა, უფალო, და ჭეშმარიტებასა შენსა ეკლესიასა შინა წმიდათასა.
მუხლი: ღმერთი დიდებულ არს ზრახვასა შინა წმიდათასა.

პარასკევი, ხმა მე-7: აღამაღლებდით უფალსა ღმერთსა ჩვენსა, და თაყვანის-სცემდით კვარცხლბეკსა ფერხთა მისთასა, რამეთუ წმიდა არს.
მუხლი: უფალი სუფევს, განრისხნედ ერნი.
ალილუია, ხმა 1-ლი: მოიხსენე კრებული შენი, რომელ მოიგე დასაბამითგან.
მუხლი: ხოლო ღმერთმან მეუფემან ჩვენმან წინა საუკუნეთამან, შექმნა ცხოვრება შორის ქვეყანისა.

შაბათი, ხმა მე-8: იხარებდით უფლისა მიმართ და იშუებდით, მართალნი.
მუხლი: ნეტარ არიან, რომელთა მიეტევნენ უსჯულოებანნი და რომელთა დაეფარნენ ცოდვანნი.

მიცვალებულთა, ხმა მე-6: სულმან მათმან კეთილთა შინა განისუენოს.
ალილუია, ხმა მე-4: ხმობდეს მართალნი, და უფალმან ისმინა მათი, და ყოველთა ჭირთა მათთაგან იხსნა იგინი.
მუხლი: მრავალ არიან ჭირნი მართალთანი და ყოვლისავე მისგან იხსნას იგინი უფალმან.
მუხლი: ნეტარ არს, რომელი გამოირჩიე და შეიწყნარე უფალო, სახსენებელი მათი თესლითი თესლადმდე.

დიაკონი: სიბრძნით.

მედავითნე: საქმე წმიდათა მოციქულთა საკითხავი (ან რომაელთა, ან კორინთელთა მიმართ ეპისტოლე წმიდისა პავლე მოციქულისა საკითხავი).
დიაკონი: მოხედენ.
მედავითნე კითხულობს სამოციქულოს.
მღვდელი: მშვიდობა შენდა.
მედავითნე: და სულისაცა შენისა თანა.
დიაკონი: სიბრძნით.
მედავითნე: ალილუია, ხმა...
გუნდი: ალილუია (3-გზის). მედავითნე კითხულობს ალილუიას მუხლებს, რაზეც გუნდი პასუხობს ალილუიას გალობით.

ლოცვა სახარების კითხვის წინ

მღვდელი: გამოაბრწყინვე გულთა შინა ჩვენთა, კაცთმოყვარეო მეუფეო, ღვთისმეცნიერებისა ნათელი მიუწვდომელი, და გონებისა ჩვენისა თვალნი განახვენ, განცდად სახარებისა შენისა ქადაგებათა, და დასდევ ჩვენზედა ნეტართა მათ მცნებათა შენთა შიში, რათა ყოველი ხორციელი გულისთქმაი დავსთრგუნოთ, და ყოველი სულიერი მოქალაქობაი მოვიგოთ, და ყოველსავე სათნოდ შენდა ვზრახვიდეთ, და ვიქმოდეთ.
რამეთუ შენ ხარ განმანათლებელი სულთა და ხორცთა ჩვენთა, ქრისტე ღმერთო ჩვენო, და შენდა დიდებასა აღვავლენთ, თანადაუსამაბოთ მამით შენით და ყოვლადწმიდით და სახიერით და ცხოველსმყოფელით სულით შენით, აწ და მარადის და უკუნითი უკუნისამდე, ამინ.

დიაკონი: აკურთხე, მეუფეო, სიტყვანი კეთილმაუწყებელისა წმინდისა, დიდებულისა და ყოვლადქებულისა მოციქულისა და მახარებელისა (სახელი).

მღვდელი აკურთხებს და იტყვის: ღმერთმან, ვედრებითა წმინდისა დიდებულისა და ყოვლადქებულისა მოციქულისა და მახარებელისა (სახელი), გცეს შენ სიტყვაი, კეთილმითხრობისა ძალითა მრავლითა, აღსრულებად სახარებისა, საყვარელისა ძისა თვისისა, უფლისა ჩვენისა იესო ქრისტესა.

დიაკონი: ამინ.
მღვდელი: სიბრძნით, აღემართენით და ისმინეთ წმიდა სახარება, მშვიდობა ყოველთა.
გუნდი: და სულისაცა შენისათანა.
დიაკონი: (მათესაგან, ან ვისიც არის) წმიდისა სახარებისა საკითხავი.
გუნდი: დიდება შენდა, უფალო, დიდება შენდა.
მღვდელი: მოხედენ.
დიაკონი კითხულობს სახარებას. დასრულების შემდეგ:
გუნდი: დიდება შენდა, უფალო, დიდება შენდა.