ქართული და უცხოური სამზარეულო, უცხოეთში მცხოვრები ფორუმელების თხოვნით პარამეტრები

[ნათია]

თემა მზადაა! შეგიძლიათ დაწეროთ რეცეპტები, გააკეთოთ და "დააგემოვნოთ"

[guest]

ხშირად მარხვის დროსაც გვაქვს ხოლმე რაიმე დღესასწაული, იქნება ეს რელიგიური თუ საერო, როგორც დაბადების დღე, ან პატარის გაჩენა ან მსგავსი სიტუაციები, როცა სტუმრები გვეწვევიან . მიუხედავად მარხვისა, ყველა ჩვენგანს სურს და უხარია კარგად დახვდეს სტუმარს, ასიამოვნოს რაც შეიძლება. მე მინდა აქ დავწერო რამდენიმე სამარხო რეცეპტი, რომელიც ზემოთ აღწერილ შემთხვევებში იქნებ რომელიმე თქვენგანს გამოადგეს.
(ასევე პატარების მარხვისათვის მისაჩვევად მოტივაციისთვის შეიძლება სუფრის ერთგვაროვნებას რომ მოვერიდოთ)

ტოლმა

2 თავი ხახვი წვრილად დაჭრილი,
4-5 ცალი საშუალო ზომის პატარა კუბიკებად დაჭრილი კარტოფილი,
3-4 ასევე წრილად დაჭრილი პომიდორი,
ბრინჯი , მსხვილად გატარებული ნიგოზი (ბრინჯის და ნიგოზის რაოდენობა თქვენ თვითონ გემოვნებით აირჩიეთ),
1 თავი საშუალო ზომის ცხელ წყალში მოთუთქული კომბოსტო.

ფაქტიურად, ყველაფერი ისე როგორც ჩვეულებრივი ტოლმისთვის საჭიროა, ოღონდ ფარშია განსხვავებული და მზადდება შემდეგნაირად:

1 თავი წვრილად დაჭრილი ხახვი ზეთში მოვხრაკოთ, ჩავამატოთ წვრილ კუბიკებად დაჭრილი კარტოფილი, მოვშუშოთ ცოტა ხანი, შემდეგ კი დავამატოთ გატარებული ნიგოზი და ვხრაკოთ კიდევ ცოტა ხანი. შევკაზმოთ ცოტა ხმელი ქინძით, წიწაკა,მარილი, 2 კბილი წვრილად დაჭრილი ნიორი,ცოტა დაკეპილი ოხრახუში. გადმოვდგათ გასაცივებლად.

ამასობაში ფოთლებად გავარჩიოთ მოთუთქული კომბოსტო. გავახვიოთ ფარში ჩვეულებრივ, როგორც ტოლმა. მანამდე კი ქვაბში ოდნავ ზეთში მოვხრაკოთ დარჩენილი ხახვი, წვრილად დაჭრილი პომიდორი ან პომიდვრის წვენი, მიღებულ სოუზში ჩავალაგოთ შეხვეული ტოლმები და დავფაროთ ადუღებული წყლით, ზუსტად ისევე როგორც ჩვეულებრივი ტოლმის შემთხვევაში. მოხარშვის შემდეგ კი სოუზი შევკაზმოთ ( ქონების შემთხვევაში) დანაყილი მწვანე ქინძით, ნოირით,
(არ აწყენს აგრეთვე უნგრული გულაშის ან შპაგეტი ნაპოლის სოუზის ფხვნილის ჩამატება) მარილით. ზემოდან კი მოვაყაროთ წვრილად დაკეპილი ოხრახუში და მწვანე წიწაკა.

შეიძლება კომბოსტოს გარდა აგრეთვე ბულგარული წიწაკა, გამოგულული ბადრიჯანი ან ყაბაყი გამოვიყენოთ, ოღონდ ფარშის ჩატენვის შემდეგ ღია მხარე ამოვავლოთ დაფხვნილ ორცხობილას ფქვილში, ან ჩვეულებრივ პურის ან მჭადის ფქვილში. მე ჩამოთვლილ ბოსტბეულთაგან ყველას ვიყენებ ერთად და ძალიან გემრიელი გამოდის.






სამწუხაროდ არ ვიცი თუნფიშს ქართულად რა ქვია Thunfisch.

"შაპიცა" თუნფიშით

(სურათზე 1-ით აღნიშნული)

ფენოვანი ცომი,
თუნფიშის კონსერვი,
პატარა თავი ხახვი,
2-3 მჟავე კიტრი,
2-3 მწვანე ზეითის ხილი,
ხმელი დაფქვილი წიწაკა,
მარილი.

ფენოვანი ცომი გავაბრტყელოთ დაახლოებით 3 მმ სისქის (გერმანიაში ვინც ხართ, გამოიყენეთ "Blaetterteig", ამიტომ გაბრტყელება აღარ დაჭირდება, მხოლოდ შუაზე თუ გაჭრით ) . თუნფიშის კონსერვი ცხრილში გავწუროთ, გადავიტანოთ თასში და შევურიოთ წვრილად დაკეპილი მჟავე კიტრი, ხახვი, ზეთის ხილი,წიწაკა და მარილი (სურვილის შენთხვევაში ნიორიც შეიძლება , ოგონდ ზედმეტად ნუ გამოიყენებთ არ უხდება).

გაბრტყელებული ცომი კვადრატებად დავჭრათ და ფარში შევახვიოთ, ესეიგი, ისე შევახვიოთ, რომ მივიღოთ ნახევარწრეები უკვე შეხვეული "შაპიცები", გვერდები კი მაგალითად ჩანგლის ჭვერით მოვალამაზოთ, სურათზე ჩანს დაახლოებით როგორი ფორმა უნდა ქონდეს.

დამზადებული შაპიცები მოვათავსოთ ზეთწასმულ "ჟარუნაზე" ( ვერ ვიხსენებ ქართულად რა ქვია) და ღუმელში შევწვათ შეწითლებამდე.



თევზის მაჭკატები

(სურათზე 2-ით აღნიშნული)

ზღვის თევზის ფილეტი ანუ ძვლებისგან გატავისუფლებული თეთრი ხორცი,
კარტოფილი 5-6 ცალი,
ხახი, ნიორი, შავი წიწაკა, პურის ფქვილი,ცოტა დაფხვნილი ორცხობილა.
სანელებლები, ოხრახუში.

მოვხარშოთ გათლილი კარტოფილი, დავჭყლიტოთ ისე როგორც პიურე, ჩავამატოთ მარილი, წიწაკა ( სასურველია სულ ოდნავ მუსკატის კაკალსაც თუ ჩავახეხავთ)
,შევურიოთ ძვლებისგან გატავისუფლებული თევზის მოხარშული ხორცი და კარგად ავურიოთ ეს ყველაფერი. დავამატოთ წვრილად დაჭრილი ხახვი, 1-2 კბილი წვრილად დაკეპილი ნიორი, 1 სუფრის კოვზი პურის ფქვილი, ძალიან წვრილად დაჭრილი მწვანე ოხრახუში (შეიძლება გამხმარი მწვანე ოხრახუშიც), კიდევ ავურიოთ ეს ყველაფერი. შემდეგ დავამგრვალოთ პატარა ბურთულებას, გავაბრტყელოთ ისევე როგორც კატლეტი, ამოვავლოთ დაფხვნილ ორცხობილაში (პანიერმელ) და ცხელ ზეთიან ტაფაზე შევწვათ.



კარამელის ნამცხვარი

300 გრამი შაქარი,
300 გრამი წყალი,
300 გრამი დაქვილი ნიგოზი,
300 გრამი მცენარეული ზეთი,
18 სუფრის კოვზი პურის ფქვილი,
1 სუფრის კოვზი სოდა.

1 ჭიქა (100 გრამი) შაქარი ცხელ ტაფაში დავადნოთ, სანამ კარამელის ფერს არ მიიღებს, დავასხათ 3 ასეთივე ჭიქა წყალი და ცოტა ხანს ვურიოთ.მერე გადმოვდგათ და გავაცივოთ. შემდეგ გადავასხათ დიდ თასში, ჩავამატოთ დარჩენილი შაქარი, ზეთი, ნიგოზი, სოდა და კარგად ავურიოთ, შემდეგ კი ჩავაყაროთ ფქვილი და კიდევ ავურიოთ, სანამ ერთგვაროვან მასას არ მივიღებთ. დავასხათ ზეთმოსმულ "ფიქფიტაზე" და ღუმელში გამოვაცხოთ.

გავაცივოთ და დავჭრათ კვადრატებად ან რომბებად, როგორც გსურთ, თავზე მოვაფრქვიოთ შაქრის პუდრა ან სურვილისამებრ ისევ დაფქვილი კაკალი,ან ნუში, ან თქვენ თვითონ რასაც ირჩევთ. საზეიმო პირობებში მე ვიყენებ მწარე შოკოლადის ფილებს , ანუ ე.წ. საზარეულო შოკოლადს, რომელიც რძეს არ შეიცავს, მოკლედ, ამ შოკოლადისგან ვამზადებ გლაზურს- უბრალოდ ვადნობ მას ტაფაზე და ნამცხვარს დაჭრამდე ზემოდან ვასხამ, ჩანგლით წვერით შეიძლება ტალღების ან რაიმე ფიგურების დახატვაც, ეს უკვე თქვენი ფანტაზიაა.ძალიან აუცილებელ შემთხვევებში შეიძლება სოიოს რძეზე დავამზადოთ აგრეთვე მოხარშული კრემი და შოკოლადის ერთად კომბინაციაში მოვრთოთ ეს ნამცხვარი და ტორტის სახეც მივცეთ, ან გამოვიყენოთ მზა პუდინგის ფხვნილი, რომელსაც წყალზე დავამზადებთ (იხ. სურათი).


(სურათზე უკრემოდ და მეორე კი კრემიანი)