ბიძია თომას ქოხი პარამეტრები

[ზარნაშო]

1

მზემ ბორვცვებს იქიდან ამოაჭყიტა და ფორუმის დასახლებას ირიბი სხივები გადააფინა. ბიძია თომა აივანზე გამოვიდა, გაიზმორა და სოფელს თვალი მოავლო. მეზობელ ეზოში თავწაკრული Kato_Bato მამალს დასდევდა დასაჭერად.
- დილა მშვიდობისა მეზობელო!
- მშვიდობა და არგადარ... სიკეთე ნუ მოგიშალოს!
- სტუმრებს ელოდები თუ რას ერჩი მაგ მამალს?
- დღეს ჩემი საბა ჩამოდის ქალაქიდან თავისი ცოლით და პატარებით. შვებულება ოუღია ორკვირანი.
- ვახ, მოსალოცი ამბავია. ძალიან დაგვივიწყა მაგ ბიჭმა.
- რა ქნას ნენა, სამსახურს თავს ხომ ვერ დაანებებს?
ბიძია თომამ რეზინის ჩექმები ამოიცვა, ბადე მხარზე გადაიგდო და სათევზაოდ გაეშურა. სოფელი ნელ-ნელა იღვიძებდა. M.M. თავისი სახლის წინ გამართულ ძელსკამზე ჩამომჯდარიყო და ელოდა როდის მოიცლიდა მისი კარის მეზობელი k@the შაირობისთვის.
- დილა მშვიდობის M.M., როგორ ხარ?
- ეჰ, აბა როგო ვიქნები ჩემი დედაკაცის ხელში... - M.M.-მა ცუღლუტად გაიღიმა და ჭაღარა წვერზე ხელი ჩამოისვა.
არადა ყველამ იცოდა მისი და *******-ს სანიმუშო ცოლ-ქმრობის ამბავი. სოფელში ქალ ვაჟი რომ დაქორწინდებოდა, ასე ლოცავდნენ: M.M. და *******-სავით ტკბილად შეაბერდით ერთმანეთსო.
- რა გინდა ძმაო, მოდერი ქალი გინდოდა და გერგო კიდეც - ღიმილითვე მიუგო ბიძია თომამ და გზა განაგრძო.
ცოტა ხანში ნათიას "კოლხოზნიკის" რახრახი შემოესმა უკანიდან. ამ "კოლხოზნიკს" თუმცა ხანდახან კარი სძვრებოდა და არც კომფორტულობით გამოირჩეოდა, მაგრამ admin-ის "ზაპოროჟეცთან" ერთად საუკეთესო მანქანად ითვლებოდა სოფელში.
- ზღვისკენ, ნათი? გამაყოლე მეცა
ნათიამ გაუჩერა და თემომ წესიერად ვერც მოასწრო სავარძელზე მოკალათება, რომ მკვეთრად მოწყვიტა მანქანა ადგილიდან და გაზის პედალს ბოლომდე დააწვა. "ესღა უნდა ჩემ ბებერ ძვლებს?" - გაიფიქრა ბიძია თომამ და ოღროჩოღრო გზაზე წონასწორობა რომ შეენარჩუნებინა, მის წინ სკოჩით მიმაგრებულ ხის უჯრას ჩაებღაუჭა, რომელიც "ბარდაჩოკის" მაგივრობას სწევდა. უჯრა გადმოიხსნა და იქიდან შოკლოლადები გადმოცვივდა, თუმცა მალევე აკრიფეს.
ნათიამ თანამგზავრი სენატის კლდესთან ჩამოსვა, თვითონ კი სანაპიროს გაუყვა. მთელი დღე ასე დადიოდა ხოლმე და სილაზე გამორიყულ დელფინებს ეძებდა. რომელსაც ცოცხალს მიუსწრებდა, ზღვაში უშვებდა, მკვდრებს კი მარხავდა.
ბიძია თომა შუადღისას დაბრუნდა სოფელში. ბევრი ვერაფერი დაეჭირა, თუმცა მისთვის მთავარი თევზაობის პროცესი იყო და არა შედეგი. თევზი ცოლს ჩააბარა, ჩექმები და ბადე აივანზე დატოვა და თვითონ თავისი "სასაუბროსაკენ" გაემართა. "სასაუბრო", ანუ ბიძია თომას ქოხი, როგორც მას ყველა ეძახდა, მთელი სოფლის მოხუცების თავშეყრის ადგილი იყო. ბიძია თომამ ის ათიოდე წლის წინ ააშენა. ქოხი ოთხ ბოძზე იყო შეყენებული. უკანა ორი ბოძი თემოს ღობის ნაწილი იყო, წინა ორი კი გზისპირზე იდგა. სიმართლე რომ ითქვას, გზისპირზე კი არა, სავალ ნაწილზე, მაგრამ ამ პტარა უწესრიგობაზე admin-იცა და მცხოვრებლებიც თვალს ხუჭავდნენ.
სასაუბროში ასვლისთანავე მასპინძელმა ვიღაცის ნაბიჯებს მოჰკრა ყური კიბეზე. კიბის ძალუმი ჭრაჭუნის მიხედვით დაასკვნა, ქავთარაძე იქნებაო და არც შემცდარა. მისალმების შემდეგ ბიძია თომამ კედელთან მიდგმული სკივრიდან (რომელიც სკამის მოვალეობასაც ასრულებდა) ერთი გრაფინი არაყი, ორი ჭიქა და პატარა პარკით ორცხობილა ამოიღო. მაგიდაზე სუფრის მაგივრად "Feigenblatt"-ის რამდენიმე ფურცელი ეფარა. ამ გაზეთს ფორუმის გერმანული დიასპორა გამოსცემდა k@the-ს თაოსნობით. მთელი ტირაჟი გამოსვლის დღსევე იყიდებოდა, რადგან შესანიშნავ რბილ ქაღალდზე იყო დაბეჭდილი და იაფიც ღირდა.
- ღვინო არ გაქვს?
- აღარ, გამითავდა. მერე გადავალ, იქნებ komisia-ს გამოვტყუო რამე. უნდა მახვეწნინოს, ხო ვიცი.
- რა გაქ სახვეწარი, ორი ორასლიტრიანი ქვევრი არ აქვს სავსე სახლის უკან?
- მაგას ხელს არ ახლებს, ფორუმის ასი წლის იუბილესთვის ვინახავო.
- ბიჭო, რა დაძველებული იქნება! გადავყვებით კიდეც, მეტი კი არ გვინდა ბებრებს.
ნელ-ნელა შეყვნენ ლაპარაკს და არაყს, თან სხვების მოსვლის იმედიც ჰქონდათ.
- ტიტუუუუ!!! - თამარი_ცქნაფოს აივანს შემზარავი კივილი მოსწყდა, გარშემო ბორცვებიდან აირეკლა და მთელ სოფელს მოედო.
მთელმა სამეზობლომ მის ეზოში მოიყარა თავი. ცქნაფო აივანზე იდგა, ცალ ხელში გაზეთი ეჭირა, მეორეს თავში იცემდა და გულსაკლავად მოთქვამდა:
- შენ გაჩენას რატო გომბეშო არ გავაჩინე და შენ გაზრდას რატო ბულდოგი არ გავზარდეეეე..... რავა შემარცხვინე და გამათახსირე ამხელა მოდერი ქალიიიი... რეიზა მომჭერი თავი და გამომაჭენე დუნიაზეეეე...
როგორც გაირკვა, თამარი_ცქნაფოს თავისი შვილის ინტერვიუ წაუკითხავს გაზეთში, სადაც მის ნალაპარაკევში მთელი სამი (!) გრამატიკული შეცდომა აღმოაჩინა. ცქნაფო როგორც იყო დაამშვიდეს, გაზეთს გაეპარებოდა კორექტურაო და ყველა სახლებში წავიდ-წამოვიდა.
მზე ნელ-ნელა ბორცვებს მიეფარა და ადგილი მთვარეს დაუთმო. ბიძია თომას ეზოში კაკლის ხის ტოტზე ჭოტი შემოჯდა და რამდენჯერმე გულსაკლავად დაიკივლა. უეცრად რაღაცამ იგრიალა და ჭოტი ქვასავით დაენარცხა მიწაზე. კმაყოფილმა staywhite-მა თოფი მხარზე გაიდო და ოთახში შებრუნდა.

გაგრძელება იქნება.

შენიშვნები, შეკითხვები თუ სურვილები შეგიძლიათ დაწეროთ, ზედმეტ კომენტარებს გთხოვთ მოერიდოთ.

M.M.

[ზარნაშო]

2

სოფლის ეკელსიის ზარებმა ექვსსაათიანი რომ დარეკეს, ბიძია თომა უკვე ნახევარი საათის ამდგარი იყო. აივანზე გამოვიდა და დაელოდა მნათე როდის გამოივლიდა ეკლესიიდან სახლისკენ. დიდხანს არც მოუწია ლოდინი.
- ბიჭო, მნათე, რით ვეღარ ისწავლე ზარების თანაბრად რეკვა? დაბერდი კაცი ამ საქმეში.
- ნუ იქნებით რომის პაპზე უფრო მეტი პაპები! ამ წვრილმანებში არაა ქრისტიანობა.
- პაპი არ ვიცი და ნერვებზე კი ძაანა მოქმედებს. თუ დაგიჭახანა ერთხელ ნანამ და გადმოგაგდო მაგ სამრეკლოდან, მერე ნახე შენა. ერთი უნდა ვთხოვო, ქვამარილი მაინც მოგარჭოს რბილ ადგილას.
მნათემ იგი პასუხის ღირსადაც არ ჩააგდო და ქედმაღლური გამომეტყველებით განაგრძო გზა. ის იყო თვალს მიეფარა, რომ ორღობეში ახლა qarcivadze, Nanio და Didgoreli გამოჩნდნენ. ნელა მოსეირნობდნენ და მოიღინებდნენ: "დილა არის ცა ლაჟვარდი და..."
- ეჰ, რაღა ლაჟვარდი, დაგვაღრჩო ამ გამონაბოლქვმა, ჩვენ მთავრობას რო (...) (...) (...)!
მთავრობის ხსენებაზე ყველას უნებურად კანონისტის კარმიდამოსკენ გაექცა მზერა. თავისი პრეზიდენტობის რვა წლის განმავლობაში დავითმა უზარმაზარი სასახლე წამოჭიმა სოფლის განაპირა გორაკზე, მაგრამ ჩამოსვლას იშვიათად ახერხებდა. მას შემდეგ, რაც ორივე საპრეზიდენტო ვადა ამოწურა, კანცელარიას ჩაუდგა სათავეში და მიუხედავად სოლიდური ასაკისა, ყოჩაღად უძღვებოდა საქმეს.
"მთავრობა რა შუაშია, როცა მეწარმეები და თვითონ მოსახლეობა ვერ გრძნობენ პასუხისმგებლობას მშობლიური ბუნებისა და მომავალი თაობის წინაშე?" - ალბათ ასე იტყოდა, აქ რომ ყოფილიყო.
დიდგორელები თვალს რომ მიეფარნენ, გზაზე admin-ის "ზაპოროჟეცი" გამორახრახდა. თემოს სახლის წინ მანქანამ სასულეში წყალგადაცდენილი ცხენივით დაახველა და გაჩერდა.
- დილა მშვიდობისა, ბიძია თომა! როგორ ხარ, როგორ გიკითხო?
- მშვიდობა ნუ მოგიშალოს, რაზე შეწუხდი admin-ბატონო?
- ხომ იცი, პატარა რემონტი წამოვიწყე ჩემთან. ბურღი მჭირდება, თან ცოტა დიდი.
- მე არ მაქვს, მაგრამ S a l l y-ს აქვს, ნამდვილად ვიცი. იაპონური ბურღია, უმაღლესი ხარისხის. ბარძაყისსიმსხო მუხის მორში გამჭოლი ნახვრეტი გააკეთა, ახალნაყიდს როცა ცდიდა.
- კარგი, მაშინ იმას გავუვლი.
admin-მა მესამე ცდაზე როგორც იყო დაქოქა მანქანა და სოფლის შარაგზას გაუყვა.
მზე უკვე მთლიანად ამოსულიყო ბორცვებს იქიდან. ფორუმის დასახლება ნელ-ნელა იწყებდა თავის ყოვედღიურ საქმიანობას.