ვინ არის იესო ქრისტე? პარამეტრები

[Kanishtha-Adhikar]

ამ კითხვაზე მსურს დამაკმაყოფილებელი პასუხის მიღება ბიბლიიდან.

მე ვთხოვ მართლმადიდებლობის კარგად მცოდნე ფორუმელებს, რომ გამომეხმაურონ და ამიხსნან, თუ ვინ არის იესო ქრისტე სინამდვილეში და რა დამოკიდებულება აქვს მამა ღმერთთან.
მაინტერესებს როგორ წარმოაჩენს ქრისტეს პიროვნებას ბიბლია.

იესოს შესახებ დაინტერესება ყველა ვაიშნავს აქვს და ასევე მეც.
თუმცა მის შესახებ არ არის დოგმატური სწავლება ვაიშნავიზმში, მაინც გვესმის კრიშნას მიმდევრებს (ჩვენებური გადასახედიდან) თუ ვინ შეიძლება იყოს იგი.

ეხლა სოხუმშიც ძალიან მომრავლდა ქრისტეს მრავალი მქადაგებელი: ე.წ. "იეღოველები", ორმოცდათიანელები, ბაპტისტები და საიენტისტები (მაპატიეთ თუ ზუსტი ტერმინოლოგიით ვერ გამოვთქვამ მათი კრების სახელებს).
მე თითოეულ მათგანს ვესაუბრე იესოს შესახებ და თითქმის ყველამ განსხვავებულად წარმოაჩინა ქრისტეს არსი და პიროვნება.
მე მესმის, რომ მართლმადიდებლობა სასტიკად ამხელს ასეთ სწავლებებს ქრისტეს შესახებ, როგორც მათ აქვთ და ვინაიდან ეს ასეა, მაშინ ეხლა თქვენ გთხოვთ ახსნას შესაბამის საკითხზე.

იმედი მაქვს ამომწურავად იქნება პასუხები.

წინასწარ გიხდით დიდ მადლობას
ჰარე კრიშნა!



პ.ს. ლელუაშვილი შენი იმედი მაქ

[georgios]

Kanishtha-Adhikar

ახლა მაინტერესებს რას ასწავლის ქრისტიანობა სულიწმინდის შესახებ.

სწავლების მიხედვით, სულიწმინდის თვისებაა მამისაგან გამომავლობა. ის მამისაგან გამოვალს მარადიულად, ისევე როგორც ძე იშობა მამისგან მარადიულად. სულიწმინდა მამასთან და ძესთან ერთად არის შემოქმედი ხილული და უხილავი სამყაროსი. სულიწმინდის გადმოსვლაზე ლოცულობდა ჯერ კიდევ ძველი აღთქმის პერიოდში დავით მეფსალმუნე:

"სუფთა გული შეჰქმენი ჩემში, ღმერთო, და წრფელი სული განაახლე ჩემს სხეულში.
ნუ უკუმაგდებ შენგან და ნუ წამართმევ შენი სიწმიდის სულს.
დამიბრუნე სიხარული შენი ხსნით და დიდებული სულით გამამაგრე."

ქრისტიანული სწავლებით, სულიწმინდის ნიჭით იღებდნენ ადამიანები სხვადასხვა ცოდნას, გამოცხადებას, უნარებს "ამიტომაც გაუწყებთ, რომ ვერავინ, ვისაც ღვთის სული ალაპარაკებს, ვერ იტყვის, იესო შეჩვენებულიაო, და ვერც უფალს უწოდებს იესოს, თუ არა სულით წმიდით."

სულიწმინდის მოქმედებით მუცლად იღო მარიამმა და ხორცი შეისხა ძემ ღვთისამ "მიუგო ანგელოზმა და უთხრა მას: სული წმიდა გადმოვა შენზე, და უზენაესის ძალა მოგიჩრდილებს. ამიტომაც ღმრთის ძედ იწოდება წმიდა შობილი."

სულიწმინდის მოქმედებაზე საუბრობენ წმინდა საიდუმლოთა აღსრულების დროს.

სულიწმინდა მოიხსენიება როგორც განმწმენდი ძალა
"მე წყლით გნათლავთ, რომ მოინანიოთ, ხოლო ჩემს შემდეგ მომავალი ჩემზე უძლიერესია, ვისი ხამლის ტარებისაც არა ვარ ღირსი; და ის მოგნათლავთ სული წმიდითა და ცეცხლით."

ჭეშმარიტების სული
"ხოლო როდესაც მოვა იგი, ჭეშმარიტების სული, წაგიძღვებათ ყოველი ჭეშმარიტებისაკენ; ვინაიდან თავისით კი არ ილაპარაკებს, არამედ რასაც მოისმენს, იმას იტყვის, და მომავალს გაუწყებთ თქვენ."

სულიწმინდის გმობის დამღუპველობაზე საუბრობს იესო, რაშიც იგულისხმება ჭეშმარიტების დანახვისას მისი შეგნებული უარყოფა და არმიღება
"ვინც იტყვის სიტყვას კაცის ძის წინააღმდეგ, მიეტევება მას; მაგრამ ვინც იტყვის სიტყვას სული წმიდის წინააღმდეგ, არ მიეტევება მას, არც ამ წუთისოფლად და არც საუკუნო სოფლად."

მისგან მომდინარეობს წინასწარმეტყველების ნიჭი
"მასზედაც გადმოვიდა ღვთის სული და ისიც გაქადაგდა გზაში, ნავათში მისვლამდე."

სხვადასხვა ენებზე ლაპარაკის ნიჭი, რომელიც მიეცათ მოციქულებს სულთმოფენობისას
"ყველანი აღივსნენ სულით წმიდით და სხვადასხვა ენებზე ალაპარაკდნენ, როგორც სული ამეტყველებდა მათ."

დიდი ფიზიკური ძალა, რომელიც მიიღო სამსონმა
"მოიცვა იგი უფლის სულმა და თიკანივით შუაზე გახლიჩა ლომი, ისე რომ ხელში არაფერი სჭერია."

სულიწმინდის ნაყოფია "სიყვარული, სიხარული, მშვიდობა, დიდსულოვნება, სიტკბოება, სიკეთე, რწმენა, თვინიერება, თავშეკავება."