"მომავლის გადია" - იაკობ გოგებაშვილი პარამეტრები

[marine]

წარმოუდგენელია, არსებობდეს ეს განყოფილება და არ იყოს თემა იაკობ გოგებაშვილზე.


"ჩემი და ილიას ღვაწლი რა მოსატანია იმ დიდ ღვაწლთან, რომელიც იაკობ გოგებაშვილს მიუძღვის ქართველი ერის წინაშე - იაკობმა ქართველ ხალხს ქართული ენის სიტკბოება ყურში ჩააწვეთა, ქართველ ხალხს ქართული ენა შეაყვარა, განა ეს პატარა საქმეა?! იაკობ გოგებაშვილი ღირსია, რომ ქართველმა ხალხმა სიცოცხლეშივე დაუდგას ძეგლი", - წერდა აკაკი."

[marine]

" - თქვენ იაკობ გოგებაშვილის საზოგადოების თავმჯდომარე და "დედაენის" რედაქტორი ბრძანდებით. სასიამოვნო ფაქტია, რომ გოგებაშვილის "დედაენა" შარშან, საუკუნის შემდეგ, სკოლას დაუბრუნდა. თუ შეიძლება, გვესაუბრეთ ამ საკითხზე.

- "დედაენა" გოგებაშვილის საავტორო სიტყვაა. მანამდე ქართულ საანბანე წიგნს მსგავსი სახელი არ ჰქონია. "აი ია" არის იაკობ გოგებაშვილის ანბანის სწავლების მეთოდის უმთავრესი მიგნება. შეიძლება ითქვას, ეს ქართული კულტურის ისტორიაში უდიდესი აღმოჩენაა. "დედაენა" გამოსვლისთანავე შეუცვლელ სახელმძღვანელოდ იქცა ქართულ საგანმანათლებლო სივრცეში. გოგებაშვილი მსოფლიო პედაგოგიკის გამორჩეულ მოღვაწედ შეიძლება ჩაითვალოს. ამის ერთ-ერთი დამადასტურებელი ფაქტია ის, რომ 1960 წელს ვენესუელის ქალაქ კარაკასში მსოფლიო საანბანო წიგნების საერთაშორისო გამოფენაზე გოგებაშვილის "დედაენამ" პირველი ადგილი და გრანპრი აიღო. ეს გახლავთ უდიდესი გამარჯვება და საანბანო წიგნის გოგებაშვილისეული შედგენის მეთოდის მსოფლიოს მასშტაბით აღიარება.

"დედაენის" სკოლაში დაბრუნებისთვის ჩვენმა საზოგადოებამ 2005 წლიდან დაიწყო ბრძოლა. ჩვენ ოფიციალურად მივმართეთ მაშინდელ ექსპერტებს (სულხან-საბას უნივერსიტეტის დაწყებითი პედაგოგიკის კათედრას, პედაგოგთა დახელოვნების ინსტიტუტს) შეკითხვით, პასუხობდა თუ არა იაკობ გოგებაშვილი დღევანდელობას. მათი პასუხი მტკიცედ დადებითი იყო, გვითხრეს, რომ არათუ პასუხობდა, უსწრებდა კიდეც დღევანდელ ეპოქას. ამით წახალისებულებმა, განვაგრძეთ ბრძოლა დედაენისთვის, მაგრამ 2012 წლამდე ვერანაირ შედეგს ვერ მივაღწიეთ. 2013 წლის მარტში "დედაენას" მიენიჭა არამატერიალური კულტურის მემკვიდრეობის ძეგლის სტატუსი. 2014 წლის 14 აპრილს კი განესაზღვრა ეროვნული მნიშვნელობის კატეგორია. სამწუხაროდ, როგორც თავის სიცოცხლეში, იაკობ გოგებაშვილს დღესაც ჰყავს არაკეთილმოსურნენი და მოწინააღმდეგეები. როგორც თავად იაკობი იტყოდა, "კუჭისა და სახსრის მოტრფიალე მოქალაქეები". გასაოცარია, მაგრამ ასეთი უნიკალური ეროვნული განძის სკოლაში დაბრუნება მხოლოდ საკანონმდებლო დონეზე - პარლამენტის ბრძანებით გახდა შესაძლებელი. საბედნიეროდ, 2019 წელს იაკობ გოგებაშვილის "დედაენა" თავისივე ავტორის სახელით 100 წლის შემდეგ დაუბრუნდა ქართულ სკოლას".