უნაყოფო ლეღვის ხე პარამეტრები

[მარიამი]

მარკოზის სახარებას ვკითხულობდი ახლა და ამ საკითხზე ჩავფიქრდი:

"ხოლო მეორე დღეს, ბეთანიიდან წამოსულს მოშივდა;
შორიდან დაინახა გაფოთლილი ლეღვის ხე და მივიდა, იქნებ ზედ რამე ვიპოვოო, მაგრამ მისულმა ვერაფერი ნახა ფოთლების გარდა, ვინაიდან ჯერ კიდევ არ მოეწია ლეღვის მწიფობას.
და უთხრა მას: აღარავის ეგემოს შენი ნაყოფი უკუნისამდე" (თავი 11)

მართალი გითხრათ, დიდხანს არ მიძებნია განმარტება, ახლო-მახლო მოვიძიე და კარგად მაინც ვერ გავიგე.
როგორც ვხვდები, უნაყოფო ლეღვის ხეს შედარებულია ის ადამიანი, ვისაც თავისი ცხოვრებით კეთილი ნაყოფი არ მოაქვს. მაგრამ სახარებაში წერია, რომ არ იყო ნაყოფის გამოღების დრო. რატომ ელოდა უფალი ნაყოფს დროზე ადრე?
აქვე მეორე ეპიზოდი გამახსენდა ასევე უნაყოფო ხეზე, რომლის მოჭრაც უნდოდა ბატონს და მსახურის თხოვნით გადადო ნაყოფის მოლოდინში. ანუ, აქ თითქოს უფალი საწინააღმდეგოდ იქცევა.

იქნებ გამარკვიოთ, ვინმემ თუ იცის განმარტება.

[marine]

"ლეღვის ხის შეჩვენება და მისი უეცარი გახმობა მარტო იმისთვის კი არ ინება იესომ, რომ თავისი ღვთაებრივი ღირსება და ძალა დაემოწმებინა მოწაფეთათვის, არამედ უფრო იმისთვის, რათა ლეღვის ხის უნაყოფობით გაეხსენებინა მათთვის ადამიანის არსებობის მიზანი, რომ ყველას ევალება გამოღება ღვთისათვის სათნო კეთილი ნაყოფის, რომ უნაყოფოსა და უსარგებლოს ელის გამხმარი ლეღვის ხის ხვედრი.

უნაყოფობა და უსარგებლობა ლეღვის ხისათვის ის სიმძიმე და დაბრკოლება გახდა, რამაც ღვთის წმიდა ნების აღსრულებას დააშორა იგი. ასეთი სიმძიმე და დაბრკოლება ადამიანისთვის არის ურწმუნოება და მისგან გამომავალი ადამიანური მანკიერებანი, ამპარტავნება, სიამაყე, პატივმოყვარეობა და ამათი მსგავსი, რამაც ადამიანს დააკარგვინა ღმერთი"

/მიტროპოლიტი ზოსიმე (შიოშვილი)/