წმინდა მამათა გამონათქვამები, გამონათქვამები, წერილები, ამონარიდები ქადაგებებიდან და ა.შ პარამეტრები

[marine]

N22. წერილი პენსიონერ ს.პ-ს, რომელმაც თავისი გონებით იაპონია-ჩინეთის ომი განმარტა

უნდა ვაღიარო, რომ გამაკვირვა თქვენმა განმარტებამ ჩინეთ-იაპონიის შეტაკებაზე. ამბობთ, ევროპამ აიცილა ომის საფრთხე. ომი მოხდება დედამიწის იმ მხარეს, სადაც ღამეა, როცა ჩვენთან დღეაო. და სიხარულით უწინასწარმეტყველებთ მშვიდობას ევროპას.

განა შეიძლება შენი მშვიდობა გიხაროდეს, როცა გესმის, სამყაროს რომელიღაც ნაწილში სისხლი იღვრებაო? განა სასიამოვნოა თქვენთვის: საჭმელი და სასმელი, კინემატოგრაფია, მხიარულება, სიცილი და ხუმრობები, როცა გონებით გადახედავთ მანჯურიის ველებს და ხედავთ გაყინულ, დასისხლიანებულ, მშიერსა და გამხეცებულ ადამიანებს, ისინიც ხომ შენებრ ადამისა და ევას შვილები არიან? ყოველ საღამოს რადიოს უსმენთ და გგონიათ, რომ ამ ყბედობით უფრო ჭკვიანი გახდებით. ყველაზე მთავარი, რაც შეიძლებოდა რადიოს შეეტყობინებინა, ესაა - ათასობით დაჭრილისა და მომაკვდავის კვნესა, ტირილი დედათა, ქვრივთა და ობოლთა ამ ორი დიდი სახელმწიფოსი. ყველანი ისეთივენი არიან, როგორიც თქვენ, სიცოცხლე და ბედნიერება რომ სწყურიათ. მათაც იგივე მზე დაჰნათის თავს, რომელიც თქვენ და ისე, როგორც თქვენ, მათაც უცქერის აცრემლებული თვალნი უფლისა.
შესაბამისად, მხიარულების კი არა, მწუხარების ჟამია და ეს მწუხარება ერთი ან ორი კაცისა კი არ არის, არამედ ხალხებისა და ტომების მწუხარებაცაა, სახელმწიფოს მწუხარებაა. როცა ევროპის სახელმწიფოთა მეთაურნი აცხადებენ ეროვნულ გლოვას რომელიმე ბურბონის ან საბაის პრინცის სიკვდილის გამო, როგორღა ივიწყებენ გლოვის გამოცხადებას ათასობით ადამიანის ძალადობრივი სიკვდილის გამო - რომელთაგან თითოეული ღვთის თვალში პრინცია? ევროპელები მართლაც განათლებულნი რომ იყვნენ, მაშინ სახელმწიფო და სახალხო გლოვას გამოაცხადებდნენ დედამიწის ნებისმიერ წერტილში გაჩაღებული ნებისმიერი ომის გამო. თანაგრძნობის სახელით დაიკეტებოდა რესტორნები, სათამაშო სახლები და კინოთეატრები, აიკრძალებოდა ყველანაირი გართობა, სანამ ძმის სისხლი იღვრება. როგორ გაიხარებდა ზეცა, თუ სლავები პირველები დავაწესებდით ამას!
შეიძლება ჩემმა ნათქვამმა გაგაცინოთ. ვიცი, პილატეც გაიცინებდა, მაგრამ ისიც ვიცი, რომ ქრისტე არ გაიცინებდა. ევროპა უზრუნველყოფილია სიმშვიდით, ომის ცეცხლი თქვენგან შორს გაჩაღდაო, - ამაზე ძალზე ფრთხილად იყავით. ნუ დაუჯერებთ ნურც საკუთარ თავს, ნურც წინასწარმეტყველებას, როცა ხანძარი ტყის ერთ მხარეს მოედება, განა ქარს არ შეუძლია ნაპერწკლის მის მეორე მხარეს გადატანა?
მშვიდობა თქვენდა და წყალობა უფლის მიერ.

/წმ. ნიკოლოზ სერბი/

[marine]

"ამბა იოსები უქმობას დემონურ საცდურთა მთავარ იარაღად თვლიდა".

[marine]

"ღვთის ხსოვნის სიტკბო"

/ფილოთეოს სინელი/

[marine]

წერილი მეფუტკრე მ.ა-ს ფუტკრებისგან დარიგებულზე

"მთელი სიცოცხლე ერთ კეთილშობილურ საქმეს მისდევდით - მეფუტკრეობას და ახლა ფუტკრებისაგან მიღებულ განსაკუთრებულ გამოცდილებას სხვებს უნაწილებთ. მათზე დაკვირვებისას დარწმუნდით, რომ ფუტკრები თავს სასტიკად ესხმიან ბოროტსა და უსაქმურ ადამიანებს. ძალზე იშვიათად ნესტრავს ფუტკარი ბავშვებს, ქალწულს და საერთოდ წმინდა და კეთილ ადამიანს, უფრო სწორად, ისინი მათ არასოდეს კბენენ, თუ მათგან საფრთხეს არ მოელიან. შესაბამისად, არაწმინდებს თავს ესხმიან, წმინდანთაგან კი მხოლოდ თავს იცავენ. ერთხელ ფუტკრებმა ბანდიტებისაგანაც კი გიხსნეს. თქვენი გაძარცვა სურდათ, თქვენ ფულს არ აძლევდით, ფუტკრები კი ეცნენ თავდამსხმელებს და ისე დაკბინეს, რომ ძლივსღა მოახერხეს საფუტკრიდან გასვლა.

წმინდა წერილში ნათქვამია: "წადი ჭიანჭველებთან, ზარმაცო, ნახე მათი საქმიანობა და იქმენ ბრძენი" (იგავი 6,6). ფუტკრებთან შეიძლება გავგზავნოთ ხელზარმაცი და გონებაზარმაცი, რათა ისწავლონ შრომისმოყვარეობა, ზომიერება, წესრიგი, წინასწარ განჭვრეტა და კიდევ ერთი დიდი რამ, უდიდესიც კი - თავშეწირვა. თავისი სკის "ხალხისთვის" თითოეული ფუტკარი ყოველ წუთს მზად არის თავი დადოს, გაწიროს საკუთარი სიცოცხლე. ყველაზე დიდ საერთო თავგანწირვას ფუტკრები ყრისას აჩვენებენ.

ერთმა სახელგანთქმულმა ბელგიელმა ფუტკრების ცხოვრებას წიგნი მიუძღვნა. აი, რას ამბობს ის ფუტკრის ყრაზე: "ეს მხოლოდ უბრალო გადასახლება კი არ არის ფუტკრებისა, მსხვერპლია, შეგნებული მსხვერპლი, რომელსაც ახლანდელი თაობა მისი შემცვლელი თაობისთვის გაიღებს... ეს არ არის ინსტინქტი, არც ბუნების კანონი. ჩვეულებრივად კანონს ვეძახით იმას, რაც ჩვენთვის აუხსნელია, სულერთია, ფუტკრებს ეხება თუ ადამიანებს"... მაშ, ეს რაღაა? სიყვარული და ზრუნვა პატარებზე, ფუტკრების ახალ თაობაზე. ამ სიყვარულის გულისთვის ძველი ფუტკრები იყრებიან და ტოვებენ საკუთარ სახლს, ტოვებენ თაფლით ავსებულს და მიფრინავენ უცნობ მხარეში თავშესაფრის მოსაძებნად. წარმოიდგინეთ, როგორ მოიქცეოდნენ ყველაზე თავგანწირული პატრიოტები, თუ მათ ეტყოდნენ: "ახალგაზრდა თაობის გულისთვის დატოვეთ ოჯახები, სახლ-კარი და წადით!" განა ბევრი მოიძებნება კაცთაგან უყოყმანოდ მიმბაძველი ფუტკრისა?
ეს ავტორი ფუტკრებზე კიდევ უამრავ საოცრებას, სასწაულებს წერს: თურმე ფუტკრები ერთმანეთში საუბრობენ, აწყობენ კრებებს, მღერიან - სამხიარულოსა და სამწუხაროს, აქვთ საომარი შეძახილები (ბრძანებები); ისინი უამრავ უწვრილეს, აზრით აღსავსე ბგერას გამოყოფენ (მეტერლინკი, "ფუტკრების ცხოვრება"). ფუტკრებს შორის არ არიან "უღმრთოები". მეტიც, ზოგიერთებმა ფუტკრების დახმარებით შეიცნეს ღმერთი, შემოქმედი თვისი, და მისი საოცარი განგებულება ყოველ ქმნილებაზე."

/წმ. ნიკოლოზ სერბი/

[marine]

"სულიერი სიმშვიდე მოიპოვება ღვთის ნებისადმი სრული მინდობით".

/წმ. ანტონი ოპტელი/

[marine]

"ვინც გვკიცხავს, ის გვჩუქნის, ხოლო ვინც გვაქებს, ის გვპარავას".

/წმ. ამბორი ოპტელი/

[marine]

"ოდნავაც ნუ შეშფოთდებით და გაბრაზდებით, თუ თქვენს კეთილ რჩევებს არ ისმენენ. ჩვენც ხომ არ ვუსმენთ უფალს, თუმცა იგი ამის გამო არ გვსჯის".

[marine]

"ჩვენ უნდა გავუზიაროთ ერთმანეთს ჩვენი აზრები და თუ არ მოგვწონს სხვისი აზრი, უხეშად არ უნდა ვუპასუხოთ მას. ყველას აქვს თავისი აზრი და უნდა ვიცოდეთ და გავითვალისწინოთ, რომ თუ სხვისი აზრი განსხვავებულია, შეიძლება შენს აზრზე უკეთესი აღმოჩნდეს".

/ილია მეორე/

[marine]

"უფალო, მოაბრუნე ადამიანები შენკენ, დაე, შეიცნონ მათ შენი სიყვარული, განჭვრიტონ სულიწმინდით შენი მშვენიერი სახე; დატკბნენ ყველა შენი სიკეთით აქვე, დედამიწაზე, და როდესაც დაინახავენ, როგორი ხარ, მიგემსგავსებიან შენ".

/წმ. სილუან ათონელი/

[marine]

"წმინდა წერილი არსად თავის მართლებას არ გვასწავლის. წმინდანები არათუ თავს იმართლებენ, არამედ ნებაყოფლობით იტანჯებიან სხვებისთვის".

/მამა ეფრემ კატუნაკელი/

[marine]

"ჩვენი სახიერი მამა მთლად დიდსულოვნებაა, ხარობს უმნიშვნელო შესაწირავითაც კი! თუმცა ჩვენ, ადამიანები, თაფლს მივირთქმევთ, მასთან კი ცვილი მიგვაქვს, მას ეს შესაწირიც ახარებს".

/ღირსი პაისი ათონელი/

[marine]

"ვინც ამ პრინციპით (ეგოიზმით) განლია დღენი ამ მზისქვეშეთში, ცალკეული პიროვნება, თუ სახელმწიფო, ყველა წარწყმდა და აღიგავა პირისაგან მიწისა".

/ილია II/

[marine]

"ღმერთის მქონებელი უქმად ყოფნას არ დაუშვებს".

/აბბა ფილიმონ განშორებული/

[marine]

"ლოცვით უნდა დავიწყოთ ჩვენი შრომა. ჯერ უნდა ვილოცოთ, უნდა ვთხოვოთ უფალს ლოცვა-კურთხევა და მერე ის შრომა, რომელსაც შენ გასცემ ეს იქნება დალოცვილი და კურთხეული".

/ილია II/

[marine]

"თუ წინააღმდეგობას შევწყვიტავთ, საფლავებიდან ჩვენი წინაპრები აღდგებიან, ბევრი იტანჯეს, ჩვენ კი რას ვაკეთებთ?! თუ ქრისტიანები აღმსარებლები არ გახდებიან და ბოროტებას წინ არ აღუდგებიან, გარდამაქცეველნი უფრო გათავხედდებიან".

/წმ. პაისი ათონელი/

[marine]

"პიროვნება თუ ერი, თვითონ ქმნის თავის ხვედრს. თუ ჩვენ ღვთის მცნებათა დაცვით ვიცხოვრებთ და ღვთის შიში და სიყვარული იქნება ჩვენი თანამდევი, ვერავითარი ძალა ვერ მოგვერევა".

/ილია II/

[marine]

"სარწმუნოების ნათელს გულმა და გონებამ თავისი ნათელი უნდა დაახვედროს".

/ილია II/

[marine]

"რაც უფრო მეტია ჩვენს შორის მოუნანიებელი ცოდვილი, მით უფრო ახლოა ჩვენთან ღვთის სასჯელი".

/ნეტარი თეოფილაქტე ბულგარელი/

[marine]

"გევედრები, უფალო, გარდამოავლინე სულიწმინდის მადლი ადამიანზე, დაე, შეიცნონ შენი სიყვარული. გაათბე ადამიანთა ნაღვლიანი გულები; დაე, სიხარულით გადიდონ შენ და დაივიწყონ თავიანთი მიწიერი მწუხარებანი".

/წმ. სილუან ათონელი/

[marine]

"თუკი ნამდვილად ქრისტეს სიყვარული გშია და გწყურია, იგი უსათუოდ შეიწყნარებს ამ შენს შიმშილსა და წყურვილს, და თავის საზრდოდ და სასუმელად მიიღებს მათ..."

/წმ. სვიმეონ ახალი ღვთისმეტყველი/