ლოცვა - სულიერი ხედვის დასაბამი პარამეტრები

[marine]

"უწმინდესმა შვიდგზის ლოცვა საქართველოს ეკლესიაში დიდი სიყვარულით და სიხარულით შემოიტანა. როგორ განიდევნოს ბოროტი? ოდენ ლოცვითა და მარხვით. ჭეშმარიტმა მმარხველმა და მლოცველმა იცის, რაოდენ დიდი სიხარული შემოდის ადამიანში, როდესაც ერთი მეორისთვის ლოცულობს და როდესაც მთელი ჩვენი ქვეყანა გარკვეული საათის განმავლობაში იკვრება და ერთმანეთისთვის ვლოცულობთ.

"დიდება შენდა, უფალო, დიდება შენდა, უფალო, გადაარჩინე, გაამთლიანე სრულიად საქართველო", - ასე სრულდება შვიდგზის ლოცვა, რომელიც არის უწმინდესის სიტყვები. ღმერთმა ყველას მისცეს ძალა, რომ შვიდგზის ლოცვების წაკითხვა იყოს უპირველესი მათ ცხოვრებაში."

/მამა იოანე გვაჯაია/

[marine]

"როგორ შეიძლება ლოცვის უარყოფა, რომელიც ზეცას სწვდება? ოკეანეში რომ მივცურავდით, ძლიერი სიცხისგან წყალი აორთქლდა, ნისლი წარმოქმნა და წვიმად წამოვიდა. მის წვეთებს ხელი შევუშვირე და გემო გავუსინჯე. მტკნარი იყო - მზის მცხუნვარებამ მარილი არ მიიღო და სუფთა წყალი მიითავისა... ამან ჩემთვის ცხადი გახადა, რომ უფალი ჩვენს ლოცვებს იღებს და მათ ამაოების მიწიერი მტვრისაგან განწმენდს, რომელიც ჩვენი დაცემული ბუნების გამო უნებლიეთ ეკვრის."

/ინდოელი ქრისტიანი სუნდარ სინგხი/

"ლოცვა ჯავშანია სულიერი ბრძოლისას. თუ შევიმოსავთ თავმდაბლობისა და ლოცვის ჯავშანს, მაშინ მტერი ვერას გვავნებს".

/მამა ქრისანთე/

[marine]

"წმინდა მამათა განმარტებით, როდესაც დილით ძილისგან გამოფხიზლდები, დაფიქრდი, რომ უფალი გაძლევს დღეს, რომლის მიღებაც შენ თავად არ შეგეძლო და გამოყავი ერთი საათი ან თუნდაც საათის მეოთხედი ამ მომადლებული დღისთვის და მსხვერპლად მიუტანე უფალს სამადლობელი და სავედრებელი ლოცვა.

რაც უფრო გულმოდგინედ გააკეთებ ამას, მით მეტად გაანათლებ დღეს, მით უფრო მტკიცედ მოიზღუდავ თავს საცდურთაგან, რომლებიც ყოველდღე გხვდება.

როდესაც ძილისთვის ემზადები, დაფიქრდი, რომ უფალი გაძლევს შრომისგან მოსვენებას. შენი მოსვენების დროის ნაწილი გამოსტაცე და მიუძღვენი უფალს სუფთა და თავმდაბალი ლოცვით. მისი კეთილსურნელება ანგელოზს შენს დასაცავად მოიზიდავს."

[marine]

"რომ წარემართოთ ლოცვაში უნდა გიყვარდეთ ის ადამიანები, რომლებიც წყენას გაყენებენ და უნდა ილოცოთ მანამდე, სანამ თქვენი გული არ შეურგიდება მათ. მაშინ მოგცემთ ღმერთი ლოცვის უნარს საკუთარი მტრებისთვის".

/ღირსი სილუან ათონელი/

[marine]

"არც ერთი ლოცვა, არც ერთი კარგი აზრი არ დაგვეკარგება ღვთის წინაშე"

/ბერი სილუან ათონელი/

[marine]

"ვიდრე ფეხები გემორჩილებათ, ლოცვისას იდექით, თუ გსურთ ლოცვის ნაყოფი იგემოთ"

[marine]

"ერთმა ახალგაზრდამ შესჩივლა [მამა არსენს], - როცა საჭირო ოთახში მივდივარ, სიძვის დემონი მებრძვისო.

- ებრძოლე შენც, ლოცვა წარმოთქვი სწრაფად და მოუკლებლად.

- მაგრამ განა შეიძლება ტუალეტში ლოცვა?

- ვინ გითხრა, რომ არ შეიძლება? განა არ ამბობს მოციქული: მოუკლებლად ილოცევდითო? მებრძვი შენ? გებრძვი მეც. გულისთქმებს მომივლენ? მე მათ ლოცვით განვდევნი.

განა არ იცი, ერთმა ყმაწვილმა, ბევრი ლოცვით სატანა რომ შემუსრა? ერთხელ მაცთური გამძვინვარდა მისი გულმოდგინე ლოცვის გამო. როცა ყმაწვილი საჭირო ოთახში წავიდა, მან საბაბი იპოვა, გამოეცხადა და უთხრა: - არ გრცხვენია, საჭირო ოთახში რომ ლოცულობო? ყმაწვილმა უპასუხა: - დიახ, საჭირო ოთახში ვლოცულობ, რათა ყოველივე უსარგებლო განვაგდო ჩემი სულიდანო. შერცხვენილი სატანა კვამლად გადაიქცა."

[marine]

"ლოცვაზე უფრო რთული საქმე არ არსებობს"

[marine]

"ვისაც უფალი უყვარს, მას მუდამ ახსოვს იგი, ღმრთის ხსოვნა კი ლოცვას შობს.

ლოცვა ადამიანს ცოდვისგან იცავს, რადგან მლოცველის გონება ღმერთითაა დაკავებული და იგი მდაბლადაა წარმდგარი უფლის წინაშე, რომელსაც იცნობს მისი სული".

/წმ. სილოვანე ათონელი/

[marine]

"- რა არის უმთავრესი ამ ცხოვრებაში?

- თუ ადამიანი ეკლესიურად ცხოვრობს, ადვილად ირწმუნებს წმინდა მამათა გადმოცემებს, რომ ცხოვრების მთავარი საქმე არის ლოცვა, ხოლო სხვა დანარჩენი მეორეხარისხოვანია".

[marine]

"თუ გსურს წმინდად ილოცო, იყავი მდაბალი, თავშეკავებული და ხშირად თქვი აღსარება და შეგიყვარებს ლოცვა".

/წმ. სილოვანე ათონელი/

"ლოცვისთვის ტაძრები გვაქვს მოცემული. ტაძრებში მსახურება წიგნებით სრულდება. მაგრამ ტაძარს თან ვერ წაიღებ და არც წიგნები გექნება ყოველთვის. შინაგანი ლოცვა კი ყველგან და ყოველთვის შენთანაა. ტაძარში ღმრთისმსახურება აღსრულდება და მასში სულიწმინდა არის დამკვიდრებული, მაგრამ სული უკეთესი ტაძარია ღმრთისა. ვინც სულში ლოცულობს, მისთვის მთელი ქვეყნიერება ტაძრად იქცევა, მაგრამ ეს ყველასთვის არ არის ასე".

/წმ. სილოვანე ათონელი/

[marine]

"თუ ვინმე უფლის მიმართ ლოცულობს, მაგრამ სხვა რამეზე ფიქრობს, უფალი ასეთ ლოცვას არ მოუსმენს".

/წმ. სილოვანე ათონელი/

[marine]

„ერთი სამხედრო, რომელიც თესალონიკში მიდიოდა, ჩემთან მაღაზიაში მოვიდა. ჩემმა სულმა შეიყვარა იგი და ვუთხარი: „ილოცე, რომ ნაკლები მწუხარება გქონდეს“. მან კი მიპასუხა: „ლოცვა ომში ვისწავლე, მრავალჯერ ვყოფილვარ დიდ ბრძოლებში, ნაღმები ჩემს ახლოს ფეთქდებოდა, მაგრამ მე ცოცხალი დავრჩი... უფალს ასე ვევედრებოდი: „უფალო, შემიწყალე“. ვუყურებდი მის ლოცვას და ვხედავდი, რომ ის მთლიანად ლოცვაში იყო ჩაფლული. ამიტომ უფალმა დაიცვა იგი“.

/წმ. სილოვანე ათონელი/

[marine]

"უფლის მრავალი წყალობა მინახავს ჩემს მიმართაც და იმ ადამიანთა მიმართაც, რომელთათვისაც ჩემი სული ლოცულობდა და მე მივხდი, რომ როცა უფალი ვინმეს გამო წუხილის გრძნობას და ლოცვის სურვილს გაძლევს, ეს იმას ნიშნავს, რომ მას ამ ადამიანის შეწყალება უნდა. ამიტომ თუ შენ ვინმეს გამო დარდი გაგიჩნდება, მისთვის უნდა ილოცო, რადგან უფალს სურს, რომ შენს გამო ეს ადამიანი შეიწყალოს. ილოცე, უფალი შეისმენს შენს ლოცვებს და შენ ღმერთს განადიდებ".

/წმ. სილოვანე ათონელი/

"როცა ვინმე ლოცვას მთხოვს, უფალს მისთვის ცრემლებით ვევედრები: "უფალო, შენი წმინდა სული მიეცი ამ ადამიანს, რომ სულიწმინდით შეგიცნობს"

/წმ. სილოვანე ათონელი/

[marine]

"- მამაო, როცა მორჩილებას ვასრულებ, აუცილებელია ლოცვის წარმოთქმა?

- რა თქმა უნდა, ლოცვა არ უნდა შეწყდეს".

"გუშინ მზარეულმა მითხრა: "მაკურთხეთ, მამაო. საჭმელი დავწვი". "ეტყობა, რაღაც ცუდი გულისთქმა გქონდა", - ვუპასუხე. "აღარ მახსოვს, მამაო". შენმა გონებამ რაღაც იოცნება და ლოცვა გაგიქრა-მეთქი. განა ეს ერთმანეთთან რაიმე კავშირშიაო? კავშირშია და თანაც როგორ. დაუკვირდი: როცა ლოცვას მოუკლებლად ამბობ, საჭმელი შენს გონებას არასოდეს გაფანტავს და ნახავ, რა გემრიელ კერძს მოამზადებ-მეთქი."

[marine]

"მოუკლებლად ლოცულობდა"

[marine]

"თუ გაიღვიძებ ღამით, გაიხსენე ღმერთი და ილოცე. ღამით ლოცვა მზესავითაა, ანათებს დღის ყველა საქმეს".

/წმ. ბარსანოფი დიდი/

[marine]

"ასე რომ, ძმაო, თუ გსურს, შენი შრომა კეთილნაყოფიერი იყოს, მხოლოდ სიტყვიერი ლოცვით ნურასოდეს შემოიფარგლები. გონებითაც ილოცე და გულითაც. გონებით გაიაზრე და შეიმეცნე ლოცვის სიტყვები, გულით კი შეიგრძენი ყველაფერი. მეტწილად გულით ილოცე. გულიდან წამოსული ლოცვა ელვისებურად კვეთს ზეცას და ყოვლადმოწყალე უფლის ტახტამდე აღწევს. და ღმერთიც მეტწილად მას შეიწყნარებს და შეისმენს. ასე ილოცა მოსე წინასწარმეტყველმა მეწამულ ზღვასთან და მყისვე მოესმა ხმა უფლისა: რას შემომბღავით (გამოსვ. 14,15)? და მიიღო კიდეც ძალა უფლისგან, რათა საკუთარი ხალხი მოსალოდნელი უბედურებისგან ეხსნა."

/წმ. ნიკოდიმოს მთაწმინდელი/

[marine]

"როდესაც დრო მოაწევს, უცბად ნუ მოწყდები საქმეს და ლოცვას ნუ დაიწყებ. წინასწარ მოემზადე საამისოდ: „ცოტა ხანს მდუმარედ დაჰყავი, ვიდრე გრძნობა მიჩუმდება“, - როგორც ლოცვანი გვასწავლის. გაიაზრე, რა საქმის დაწყებას აპირებ, ვინა ხარ შენ - მლოცველი და ვინაა ის, ვის წინაშეც უნდა აღავლინო ლოცვა, რა უნდა წარმოთქვა და როგორ.

ასეთი მომზადება აუცილებელია, რადგან დილით სული ძილისგან დამძიმებულია და გაღვიძებისთანავე დამდეგი დღის საზრუნავი ახსენებს თავს. საღამოს კი, განვლილი დღის მრავალფეროვანი შთაბეჭდილებანი და სხვადასხვა უსიამოვნო თუ სასიამოვნო შემთხვევები რომ წარიხოცოს, შეეცადე, ყველაფერი გამოდევნო ცნობიერებიდან.

მთელი შენი გულისყური ლოცვამ უნდა დაიპყროს და მხოლოდ მას უნდა დაუთმო დრო. შთამბეჭდავი შემთხვევები, რომელთაგანაც თავის დახსნას ვერ შეძლებ, ლოცვისას მადლობის საგნად აქციე, შემწეობა ითხოვე მისგან გასათავისუფლებლად, ან ყველა და ყველაფერი ღვთის ნებას მიანდე."

/წმ. ნიკოდიმოს მთაწმინდელი/

[marine]

"ამ განწყობით წარმოთქვი ლოცვის სიტყვები, მთელი არსებით ჩაუღრმავდი მათ და შეეცადე, იმგვარად მოედინებოდნენ გულიდან, თითქოს საკუთარი იყოს და არა დასწავლილი. ნუ მისცემს ყურადღებას სხვა მხარეს გადახრის, ხოლო აზრებს - გაფანტვის უფლებას.

როგორც კი მიხვდები, რომ ასე ხდება, აზრები შენს შიგნით დააბრუნე და იმ ადგილიდან განაგრძე ლოცვა, სადაც ყურადღება გაგეფანტა. იცოდე, თუ გულში ლოცვითი გრძნობებია, ყურადღება არ იფანტება. ამიტომ ყველაზე მეტად ამაზე იზრუნე. ლოცვისას ნურასოდეს ნუ აჩქარდები, მოთმინებითა და მოწიწებით ჩაამთავრე, როგორც წმინდა საქმე."

/წმ. ნიკოდიმოს მთაწმინდელი/

"თუ გაირჯები და ასე ილოცებ, შედეგად მიიღებ ლოცვით განწყობილებას, რომელსაც უნდა მოუფრთხილდე და დაიცვა. ამიტომ ლოცვის დასრულებისთანავე ჩვეულ საქმეს ნუ მიაშურებ, ნუ იფიქრებ, რომ ლოცვითი კანონის აღსრულებით უკვე დაასრულე ღმერთთან ურთიერთობა და ახლა შეგიძლია საკუთარ აზრებსა და გრძნობებს თავისუფლება მისცე.

არა, უნდა ეცადო, მთელი დღის განმავლობაში შეინარჩუნო ის მდგომარეობა, ლოცვისას რომ გქონდა. ამას მაშინ შეძლებ, თუ არ დაივიწყებ, რომ უფლის წინ იარები და მისი მარჯვება გაკავებს არარაობის უფსკრულის თავზე. ამგვარი აზრით აღსავსემ ყოველი საქმე, დიდიც და პატარაც, ღვთის სურვილისამებრ აღასრულე. მისგან გამოითხოვე ლოცვა-კურთხევა და ყველაფერი მისი სახელის სადიდებლად აკეთე.

თუ ასე მოიქცევი, საღამოს ლოცვად დადგომამდე შეინარჩუნებ კეთილ ლოცვით განწყობილებას. თუ საღამოს კანონსაც ასე აღასრულებ, ღამითაც მშვიდად იძინებ. ესეც შენი ლოცვითი განწყობილების ოცდაოთხი საათი. ასე გაატარე ყოველი დღე და რამდენიმე თვეში, ანდა რამდენიმე კვირაში ძლიერი მლოცველი გახდები. და ლოცვა, როგორც ჩაუქრობელი კანდელი, მუდმივად გაგითბობს სულს."

/წმ. ნიკოდიმოს მთაწმინდელი/