თემის საბეჭდი ვერსია

პოსტის ავტორი: marine თარიღი: Jun 15 2015, 07:48 PM

ფორუმელებო, ყველას მოგეხსენებათ თბილისში დატრიალებული ტრაგედიის შესახებ

გთხოვთ, ყველამ ლოცვებში მოვიხსენიოთ გარდაცვლილთა სულები და დავფიქრდეთ, თუ რატომ მოხდა ეს უბედურება ჩვენს თავს...


"- ჩვენ თუ ღმერთი დავკარგეთ, ნურაფრით ვიქნებით უკმაყოფილო. უბედურებამ ყველას კარზე მოაკაკუნა"

/დეკ. დავით შაქარაშვილი/

"უნდა იყოს გათვალისწინებული ის რაც მოხდა და აქედან უნდა გამოვიტანოთ დასკვნა"

/ილია II/

"ყველას შეეშინდა მიწისძვრისა, მე კი შემეშინდა მიწისძვრის გამომწვევი მიზეზისა".

/წმ. იოანე ოქროპირი/




http://www.radikal.ru

პოსტის ავტორი: marine თარიღი: Jun 15 2015, 10:51 PM

წუხელ გოგონა წყალმა წაიღო,
არ ჩანდა ღმერთი და კაცი ბჭობდა,
ასეთი ცოდვა ნეტავ რა იყო,
რადგან საუბარს დუმილი სჯობდა...

ღიმილით წვიმას უშვერდა ხელებს,
ზურგშექცეული ღმერთის ამარა,
ცამ, მოვარდნილი ნიაღვრის მერე,
ქალაქის თავზე დაასამარა...

თვალები ჭამდა ნაცრისფერ ქვიშას,
შეშინებული გარბოდნენ მგლები,
ღმერთმა დატოვა კუთვნილი ნიშა
და ადამიანს მისივე ნებით

მისცა ველური მხეცთა ბუნება,
განსჯის და ბჭობის, ბჭობის და განსჯის,
მაგრამ ვინც შენ არ გემსახურება,
ნუთუ ასეთი სიმკაცრით დასჯი...

მაშინ გვქონია ბევრი საერთო,
წყალმა ჩამიქრო ჭიაკოკონა,
რადგან ვერ ძლებდნენ უერთმანეთოდ,
წუხელის წვიმას გაჰყვა გოგონა...

/მამა პეტრე/

პოსტის ავტორი: marine თარიღი: Jun 17 2015, 10:23 AM

http://www.radikal.ru

პოსტის ავტორი: marine თარიღი: Jun 17 2015, 10:35 AM

სტიქიისას დაღუპული გოგონას-ინდირა ზარანდიას ჩანაწერებიდან

- პარადოქსია ჩვენს დროში, რომ გვაქვს უფრო მაღალი შენობები, მაგრამ ვართ ნაკლებად ტოლერანტულები, გვაქვს უფრო ფართო გზები, მაგრამ ვიწრო თვალთახედვა.

ვხარჯავთ მეტს, ვიღებთ ნაკლებს, ვყიდულებთ მეტს, გვიხარია ნაკლებად. გვაქვს უფრო დიდი სახლები, მაგრამ უფრო პატარა ოჯახები, ვართ უკეთესად კეთილმოწყობილები, მაგრამ გვაქვს ნაკლები დრო. გვაქვს უფრო მეტი ცოდნა, მაგრამ ვართ ნაკლებად გონიერები, გვყავს მეტი ექსპერტი, მაგრამ გვაქვს მეტი პრობლემა, გვაქვს უკეთესი მედიცინა, მაგრამ უარესი ჯანმრთელობა.

ვსვამთ ძალიან ბევრს, ვეწევით ძალიან ბევრს, დროს დაუფიქრებლად ვხარჯავთ, ვიცინით ძალიან ცოტას, ავტომობილებს ვმართავთ ძალიან სწრაფად, ვბრაზდებით იოლად, დასაძინებლად ვწვებით ძალიან გვიან, ვიღვიძებთ ძალიან დაღლილები, ვკითხულობთ ძალიან ცოტას, ძალიან ბევრს ვუყურებთ ტელევიზორს და ვლოცულობთ ძალიან იშვითად. გავზარდეთ ჩვენი ქონება, მარამ შევამცირეთ ჩვენი ღირებულებები. ვლაპარაკობთ ძალიან ბევრს, გვიყვარს იშვიათად და გვძულს ძალიან ხშირად.

ვისწავლეთ, როგორ ვიარსებოთ, მაგრამ არა როგორ ვიცხოვროთ. ჩვენ სიცოცხლეს ვამატებთ წლებს, მაგრამ არა წლებს - სიცოცხლეს. ჩვენ შევძელით მთვარეზე გაფრენა და უკან დაბრუნება, მაგრამ გვიჭირს ქუჩის გადაკვეთა და ახალი მეზობლის გაცნობა. ჩვენ დავიპყარით გარესამყარო, მაგრამ შინაგანი სამყარო ვერა.

ჩვენ ვაკეთებთ დიდ საქმეებს, მაგრამ არა უკეთესს საქმეებს. ჩვენ გავწმინდეთ ჰაერი, მაგრამ დავიბინძურეთ სული. ვწერთ მეტს, ვსწავლობთ ნაკლებს. ვგეგმავთ ბევრს, ვაღწევთ ნაკლებს. ვისწავლეთ მიტოვება და გამოქცევა, მაგრამ არა ლოდინი. ჩვენ ვქმნით მეტ კომპიუტერს, მაგრამ გვაქვს უფრო და უფრო ნაკლები კომუნიკაცია.

ეს არის დრო სწრაფი კვების და ცუდი მონელების, დიდი თანამდებობის მქონეების, მაგრამ ნაკლებად ღირსეულების. დღეს არის დრო სწრაფი მოგების და ნაკლები ურთიერთოების. დრო გაზრდილი შემოსავლებიი და განქორწინებების გაზრდილი რიცხვის. ლამაზი სახლების და განადგურებული ოჯახების.

ეს არის დრო მანძილის მალე დაფარვისა, სარეკლამო მორალისა, ერთღამიანი ურთიერთობებისა, ჭარბწონიანი სხეულების და ტაბლეტების, რომლებსაც მოვყავართ ხასიათზე, გვამშვიდებენ და გვკლავენ.

ეს არის დრო, როცა ტექნოლოგიას შეუძლია მოიტანოს ეს წერილი თქვენამდე, და დრო, როცა თქვენ შეგიძლიათ აირჩიოთ მისი გაანალიზება, ან უბრალოდ დააჭიროთ ღილაკს "Delete"
დაიმახსოვრეთ,რომ უნდა გაატაროთ დრო მათთან ვინც გიყვართ, რადგან მოვა დრო, როცა ისინი თქვენთან აღარ იქნებიან. თბილად ჩაეხუტეთ მას და უთხარით, რომ გიყვართ - ეს ერთადერთი სიმდიდრეა, რომელიც ცენტიც არ დაგიჯდებათ...

ინდი ზარანდია

პოსტის ავტორი: marine თარიღი: Jun 17 2015, 11:34 AM

გლოვა არ ნიშნავს სახის ჩამოხოკვას და ძაძების შემოსვას.გლოვაა როცა მღერი და შეწყვეტ,ცეკვავ და შეწყვეტ,ხატავ და შეწყვეტ,ოღონდ დროებით....რომ ისევ იმღერო მათთვის ვინც დაიღუპა,იცეკვო მათთვის ვინც დაიღუპა,დახატო მათთვის ვინც დაიღუპა.

/ანტონ გაგუა/

პოსტის ავტორი: marine თარიღი: Jun 17 2015, 02:46 PM

"სადაც მწუხარება არ არის, არც გადარჩენაა"

/წმ. სერაფიმე საროველი/

პოსტის ავტორი: marine თარიღი: Jun 17 2015, 09:14 PM

"დაგვიცევ და გვიხსენ ჩუენ წვიმისაგან ღუართასა, რომელი ცოდვათა ჩუენთა მიერ მოიწევის ჩვენ ზედა "

/კონდაკი 4. დაუჯდომელი ყოვლადწმინდისა ღმრთისმშობელისა - პურთათვის სიუხვისმომნიჭებელი/

პოსტის ავტორი: Zukazuka314 თარიღი: Jun 17 2015, 10:52 PM

ნეტავ რატომ მოხდა? (ღვრთის ნებას ვგულისხმობ)... და რატომ მაინდამაინც თბილისსში?

პოსტის ავტორი: marine თარიღი: Jun 18 2015, 01:50 PM

ერი რომ მძიმე, უფლის განმარისხებელ ცოდვებშია ჩაფლული, იმიტომ მოხდა და პლიუს ამას, სანამ გვერდით გვეყოლება ისეთი "ქრისტიანები" ყოველგვარ უზნეობასა და გარყვნილებას რომ მხარს უჭერენ, ეს ტრაგედია მონაგონი იქნება, ისეთი რამ მოგველის სასჯელად... ბიბლია წაიკითხე, ზუკა და ასეთი შეკითხვები აღარ დაგებადება...

პოსტის ავტორი: G_saxva თარიღი: Jun 18 2015, 04:16 PM

მამა პეტრე: ვინც თვლის, რომ ღმერთმა შური იძია, ის შორსაა მართლმადიდებლობისგან

პოსტის ავტორი: marine თარიღი: Jun 18 2015, 04:48 PM

ის არის ახლოს მართლმადიდებლობასთან ვინც ბიბლიას და შესაბამისად უფლის სიტყვებს ენდობა...



"ხშირად მრავალთაგან მესმის, რომ ღმერთი კაცთმოყვარეა და უეჭველად გადაარჩენს ყველას. ის, რომ გეჰენია იქნება, ვფიქრობ საკმარისად დამაჯერებლად დავამტკიცეთ, როცა წარმოვიდგინეთ წარღვნა, სხვა ადრინდელი უბედურებები და ავღნიშნეთ, რომ მათი შემოქმედი ღმერთი დაუსჯელს არ დატოვებს ამჟამინდელ ცოდვილებსაც. თუ მან დასაჯა ისინი, ვინც სჯულის მიცემამდე სცოდავდა, უეჭველად დასჯის მადლით შემოსილთ, რომლებმაც უფრო მძიმედ დააშავეს.
შეიძლება მითხრა: საჭიროა მხოლოდ მუქარა და არა დასჯა. ნინეველებს, რომ სცოდნოდათ: მათთვის დაწესებული სასჯელი მარტოოდენ მუქარა იყო, არ შეინანებდნენ.გინდა, ცოდვილთათვის განკუთვნილი სასჯელი მუქარა იყოს და სხვა არაფერი? ეს შენზეა დამოკიდებული გამოსწორდი და სასჯელიც მუქარად დარჩება. თუ მას არად ჩააგდებ, ნუ იყოფინ - მაშინ საქმით იწვნევ. წარღვნამდე მცხოვრებთ მუქარის რომ შეშინებოდათ, იგი სინამდვილედ არ ექცეოდათ."

წმინდა მღვდელმთავარი იოანე ოქროპირი

მე-3 საუბარი ფილიმონის მიმართ ეპისტოლეზე

პოსტის ავტორი: A.V.M თარიღი: Jul 3 2015, 09:32 PM

ღმერთმა აცხოვნოს მიცვალებულები...

პოსტის ავტორი: marine თარიღი: Aug 19 2015, 11:03 PM

http://radikal.ru/big/27485aa0ba3e4a43a30e233e4af7b5aa


მამის ლოცვა
(ივლიტას მამას...)
***
მამას დაჰკარგვია შვილი,
სატრფოს დაჰკარგვია ცოლი,
გასწყდა მარგალიტის მძივი,
გასძვრა ჯვარ_ნაწერი რგოლი.

სცივათ ტან_გადაჭრილ ვერხვებს,
სხივი დასცემია ოლარს,
ძალა გამოსცლიათ ფეხებს,
ქუჩებს ცოდვის წვიმა თქორავს.

ცისკრის შეწყვეტილა ლოცვა,
ცრემლი ეცემოდა კაბას,
წმიდა ანგელოზი როცა,
შვილის უყვებოდა ამბავს.

მიწად საფლავები დუღდა,
დილას ეცლებოდა ბინდი,
მამა_ტკივილისგან სწუხდა,
მოძღვარს_სახე ჰქონდა მშვიდი.

მეხმა გასტეხაო წამით,
თავად შეუდგაო ღმერთი,
მამას დაჰკარგვია ღამით,
მძივზე მარგალიტი ერთი.

ზეცამ აარიდა თვალი,
მშობლის სულისშემძრელ მზერას.
წყალმა მოსტაცაო ქალი,
სატრფოც ვერ გახდაო ვერას.

ქარი მოვარდნილა მწუხრზე,
მეწყერს მოუშლია ერდო,
მამა შემდგარიყო მუხლზე,
მხარზე ქრისტეს ხელი ედო.

/ნანა მეფარიშვილი/

პოსტის ავტორი: მხევალი ნინო თარიღი: Apr 3 2016, 07:56 PM

აუფ, მოუნელებელი ტრაგედიაა : (
გახედვა არ მინდა ზოოპარისკენ!

პოსტის ავტორი: A.V.M თარიღი: Apr 23 2016, 10:48 PM

მხევალი ნინო
საშინელება...

პოსტის ავტორი: marine თარიღი: Feb 1 2018, 03:33 PM

დღეს ტრაგედიის მომსწრე გავხდი... ჩვენ ტაძარში მოასვენეს რიკოთის გვირაბთან ავარიაში დაღუპული ექვსი მიცვალებული, მათ შორის ორი პატარა ბავშვი... ეს ისეთი დამთრგუნველი იყო, რომ სიტყვები ვერ გადმოსცემს... მიცვალებულებს სახეები დასისხლიანებულ-დასახიჩრებული ჰქონდათ... ახალგაზრდა დედა და პატარა ბავშვი ერთ ჩასასვენებელში იწვნენ... მოკლედ ეს იყო ტრაგედაზე მეტი... მე არ ვიცი მათი ოჯახის წევრების რა ფსიქიკამ უნდა გაუძლოს ამხელა ტკივილს... არ ვიცი ვინ იყო მათი, ერთი ახალგაზრდა კაცი, მწუხარებისგან გულშეღონებული, ცუდად გახდა და გარეთ გაიყვანეს, ტაძრის ეზოში დააჯინეს სკამზე...

ღმერთმა ნათელში ამყოფოს მათი სულები... ღმერთმა გადაატანინოს ახლობლებს მათთან განშორება...

მაპატიეთ, თუ დაგამძიმეთ, მაგრამ შეძრული ვარ...

პოსტის ავტორი: marine თარიღი: Feb 11 2019, 07:22 PM

"ყოველ დღე ისეთი საშინელება ხდება, გასული დღის ტრაგედიას გავიწყებს".

/მამა დავითი (ოქრუაშვილი)/

პოსტის ავტორი: marine თარიღი: Jun 13 2020, 02:43 PM

"მზე ისევ გაათბობს თბილისს
და აღარ იწვიმებს ,,ცა მეტს''.
რა დამავიწყებს ივნისს,
რა დამავიწყებს ცამეტს!"