წმიდა სპირიდონ თრიმიფუნტელი პარამეტრები

[marine]

"წმ. სპირიდონმა სამსახური მაჩუქა, მაგრამ ამას 23 წლის შემდეგ მივხვდი.

პირველი სამუშაო დღე ჩემს ცხოვრებაში იყო 1995 წლის 25 დეკემბერს. აქედან მოყოლებული მე სულ ვმუშაობ, მადლობა ღმერთს, ვმუშაობ ერთიდაიგივე სახელმწიფო ორგანიზაციაში. იცვლებოდა ხელმძღვანელობა - მოდიოდნენ ახლები და მიდიოდნენ ძველები, თანამშრომლები პანტიპუნტით იცვლებოდნენ. ორგანიზაციამ ბევრჯერ განიცადა რეორგანიზაცია, ხდებოდა შემცირებული, აი მე კი ვიყავი უცვლელი - ვგრძნობდი, რომ ვიღაც ძლიერ მფარველობდა.

შეიძლება მე არ მაქვს შაქარივით ტკბილი ხასიათი, არ შემიძლია ვინმესთვის ზედმეტი რევერანსები, მაგრამ ჩემი სამუშაო მიყვარს და კეთილსინდისიერად ვმუშაობ. არ მიყვარს ტყუილი - ძალიან არ მიყვარს და არასდროს ვჩუმდები ამაზე.

წელს ჩემმა ნაცნობმა, მილანოჩკამ, მაჩუქა წმ. სპირიდონის დაუჯდომელი.

მასში არის წმ. სპირიდონის ცხოვრების აღწერაც და როცა მე მე დავიწყე 40 დღე წმ. სპირიდონის დაუჯდომლის კითხვა (მქონდა რაღაც პრობლემები), აღმოვაჩინე, რომ წმინდანის ხსენების დღე არის 25 დეკემბერი. მე მაშინვე მივხვდი, რომ ეს სამსახური წმ. სპირიდონმა მაჩუქა და მთელი ამ დროის მანძილზე ის მფარველობდა მე ცოდვილს.

გმადლობ შენ, წმიდაო მამაო სპირიდონ შენი ლოცვებისთვის, შენი მეოხებისთვის ღვთის ტახტის წინაშე მე ცოდვილისათვის.

ვიცი და მჯერა, რომ შენი ლოცვებით ღმერთი არასდროს დამტოვებს, დამეხმარება და გამაძლიერებს.

წმიდაო მღვდელმთავარო სპირიდონ, ევედრე ღმერთსა მე ცოდვილისთვის!"

[marine]

"სამი წლის წინ მე ოჯახთან ერთად პატარა ქალაქიდან დიდში გადავედი საცხოვრებლად. ძველი ბინის გაყიდვისგან აღებული ფული არ იყო საკმარისი ახლის საყიდლად. რადგან ფასები სხვადასხვა ქალაქში განსხვავებული იყო. მოგვიწია იპოთეკური სესხის და სახლის რემონტისთვის კრედიტის აღება. ჩვენ ორი ბავშვი გვყავს. მხოლოდ ქმარი მუშაობს, მე მუდმივი სამსახური არ მაქვს. ფული არ გვყოფნის, ხანდახან კრედიტის გადახდაზეც კი. ვკითხულობ წმ. სპირიდონის დაუჯდომელს. წმინდას ვთხოვ, რომ მალე გავთავისუფლდეთ ვალებისა და კრედიტებისგან. ჯერ ბოლომდე ვერ გავთავისუფლდით, მაგრამ ჩემს ყოველ ჯერზე წარმოთქმულ ლოცვაზე წმ. სპირიდონი მპასუხობს - ხან მოულოდნელად რაღაცის გაყიდვას ვახერხებ, ხან ქმარს მოულოდნელი შემოსავალი უჩნდება, იქიდან, საიდანაც საერთოდ არ ველოდით.

მე არ ვკარგავ იმედს, რომ ვალებს სრულიად გავისტუმრებთ.

წმ. ნიკოლოზის დაუჯდომლის კითხვაც დავიწყე. დიდება უფალს ყველაფრისთვის.

წმ. სპირიდონ ევედრე ღმერთს ჩვენთვის!"

/მხევალი ღვთისა ელენე/

[marine]

"ჩემი ოჯახი გადადიოდა პოდმოსკოვიედან მოსკოვში. ჩვენ უნდა გაგვეყიდა ძველი და გვეყიდა ახალი ბინა მოსკოვში. როგორც მიღებულია, ეს არაა მარტივი და ჩვენ თითქმის ერთი წელი ვცდილობდით ბინის ყიდვას: მყიდველები მოდიოდნენ, ნახულობდნენ და მიდიოდნენ... მოსკოვში კი უძრავი ქონება ძვირდებოდა ყოველდღიურად.

ერთხელ ჩემმა ნაცნობმა მირჩია, წამეკითხა წმ. სპირიდონ ტრიმიფუნტელის დაუჯდომელი; მომიყვა, რომ ის ძალიან ეხმარება ადამიანებს ბინის ყიდვა-გაყიდვის საქმეში და მომცა დაუჯდომელი.

მე დავიწყე კითხვა სახლშიც და ტაძარში; სულ მალე გამოჩნდა მყიდველი, რის მერე მოსკოვშიც მოვნახეთ შესაფერისი ბინა, რომელიც ძალიან მოგვეწონა და ღირებულებაც გვაწყობდა. ნაწილი თანხის იპოთეკური სესხით დავფარეთ, მაგრამ წმ. სპირიდონის მეოხებით კრედიტიც ძალიან მალე დავფარეთ.

გადასვლის მერე მე უმუშევარი დავრჩი და კვლავ წმიდა სპირიდონს ვთხოვე - და შემოსავალი გამიჩნდა.

აუცილებელია, გქონდეს რწმენა, ილოცო და დახმარება მოვა!"

/ოლესია გერასიმოვა/

[marine]

"მე წმ. სპირიდონ ტრიმიფუნტელი ძალიან მალე მეხმარება ხოლმე. მე მას მივმართავ, როცა საერთოდ აღარ არის ხოლმე იმედი.

პირველად წმ. სპირიდონს ვთხოვე, რომ ჩემი ნათესავისთვის დაებრუნებინათ დიდი ვალი, რისი მიზეზიც მე ვიყავი. ვლოცულობდი ბევრს და დიდხანს უფლისა და წმინდანებისადმი. მეორე დღეს მოვიდა ცნობა, რომ ვალი გასტუმრებულია.

მეორეჯერ წმ. სპირიდონს ვთხოვე, რომ დამხარემბოდა ბინის გაყიდვაში, რომელიც არ იყიდებოდა 2 წელი. როცა მორიგმა კლიენტმა დარეკა, მე დავიწყე ვედრება წმ. სპირიდონის მიმართ. შემდგომ გავიგე, რომ მყიდველი მოხუცებული ბებია იყო. ვიფიქრე, რომ ის ნამდვილად არ იყიდდა, დავმშვიდდი და შევეგუე. მაგრამ რამოდენიმე დღეში დარეკა ამ ბებიამ და შვილთან ერთად იყიდეს ჩემი ბინა.

შემდგომ წმ. სპირიდონმა სასწაულებრივად, ლოცვის შედეგად, შეაძლებინა ჩემს ოჯახს, გვეყიდა სხვა ბინა.

ბევრჯერ მილოცია ასევე ჩემი და ბავშვის ჯანმრთელობისთვის წმ. სპირიდონის მიმართ ის ყოველთვის მეხმარებოდა.

ახლაც განსაცდელი გვეწვია - მამა გამიხდა ძლიერ ავად და მტკიცედ მწამს, რომ მოხდება სასწაული, ყოველთა წმინდათა ლოცვით უფალი შეგვიწყალებს.

მჯერა წმ. სპირიდონის მეოხების!

მამაო სპირიდონ, ევედრე ღმერთს ჩვენთვის!

მადლობა უფალს ყველაფრისთვის!"

/მხევალი ღვთისა ლუდმილა/

[marine]

"წმ. სპირიდონ ტრიმიფუნტელი ყველაზე საყვარელი წმინდანია.

შეიძლება ეს ვინმეს სასწაულად არ მოეჩვენოს, მაგრამ ის ძალიან დამეხმარა.

შემთხვევით ტელევიზიით გავიგე მის შესახებ და გადავწყვიტე იმ ტაძარში მისვლა, რომლიდანაც მიდიოდა რეპორტაჟი. იქ ვიყიდე წმინდანის დაუჯდომელი. გადმოცემიდან გავიგე, რომ წმინდანი ყოველთვის ეხმარება, თუკი გადაბმულად წავიკითხავთ დაუჯდომელს 30 დღე. მაშინ სასამართო გარჩევა მელოდა, მაგრამ სულ რაღაც 3 დღე იყო დარჩენილი. სინანულით გავიფიქრე, როგორ დამეხმარება წმინდანი, მე ხომ 30 დღე არ მაქვს სალოცავად მეთქი, მაგრამ იმედი ბოლოს კვდება: ის სამი დღე ვკითხულობდი დაუჯდომელს, ტროპარს და კონდაკს.

სამი დღის შემდეგ წავედი სასამართლოში და საბედნიეროდ, სასამართლო სხდომა გადაიტანეს, რამაც მომცა შესაძლებლობა, კარგად მოვმზადებულიყო.

როცა სახლში დავბრუნდი, აზრები დამეწმინდა,გონება გამინათდა და დავალაგე გეგმა, თუ რა მჭირდებოდა. მანამ ვერაფრით მოვახერხე სასამართლოზე ჩემი სიტყვის ჩამოყალიბება და საჭირო დოკუმენტაციის თავმოყრა. შემდგომ ყველაფერი დალაგდა თავის ადგილას. რაც მთავარია, სასამართლოს გადადებით მე მომეცა დრო, დარჩენილი ლოცვებიც წამეკითხა.

ყველა სასამართლო წარმატებით დასრულდა, თუმცა ლოცვებს ყოველ დღე ვკითხულობ, პერიოდულად კი დაუჯდომელსაც"

[marine]

"წმინდანი გვეხმარება რა ფულად საკითხებში ამით გულში გვიდებს ფასდაუდებელ წმიდა განძს - უფლის სიყვარულს!"

[marine]

"მე გავიგე წმიდა სპირიდონის შესახებ 2014 წლის ნოემბერში, წმიდა მატრონასთან სტუმრობის შემდეგ. ალბათ მან მიკარნახა, თუ ვისთვის მიმემართა. და შემთხვევით ინტერნეტში მე გადავაწყდი ამ საოცარი წმინდანის ისტორიას.

ჩვენ გვქონდა ძალიან დიდი პრობლემები ჩვენს ბიზნესთან დაკავშირებით. კრედიტორებმა გვიჩივლეს ვალების გამო. მე და ჩემი ქმარი დილეტანტები ვართ ამ საქმეში და სულ უნამუსო ხალხი გვხვდებოდა. მაგრამ უცებ კარგი იურისტები გამოჩნდნენ. მათ გაწელეს საქმე წელიწად ნახევარით და ჰონორარიც უმნიშვნელო მოგვთხოვეს. ჩვენი მოიჯარეც ძალიან კარგი ადამიანია და ყოველთვის შედის მდგომარეობაში. ახლა ჩვენ ბევრი ვალი გვაქვს, მაგრამ მე ვლოცულობ და მჯერა, რომ ყველაფერი მოგვარდება.

გასულ წელს მე 40 დღე წავიკითხე წმიდა სპირიდონის დაუჯდომელი, ახლაც ვკითხულობ. ყოველ დღე ვლოცულობ, დავდივარ ტაძარში, ვემთხვევი წმიდანის წმ. ნაწილიან ხატს. ასევე დავდივარ წმიდა მატრონასთან. ის, რომ ჩვენ გავუძელით წელიწად ნახევარს, ხანდახან ფულს ვშოულობდით სრულიად მოულოდნელად და რომ იყო სამუშაო - ეს ნამდვილი სასწაულია! მე ძალიან მწამს!

არასდროს მიეცეთ სასოწარკვეთილებას! ყველაფერი აუცილებლად მოგვარდება. ჩვენ გვისმენენ და აუცილებლად დაგვეხმარებიან. თუკი დახმარება არ გამოჩნდა მყისიერად, ეს ნიშნავს, რომ ჯერ არაა დრო. ზემოდან ყოველთვის ყველაფერი უკეთ ჩანს.

გმადლობ, წმიდაო სპირიდონ! მე ვიცი, რომ შენ ყოველთვის გვერდით ხარ, ყოველთვის გვისმენ და გვეხმარები!"

/მხევალი ღვთისა იულია/

[marine]

"მე მსურს მოვყვე ერთი სასწაულებრივი შემთხვევა, რომლის მოწმეც, უფრო სწორად კი - მონაწილეც თავად ვიყავი.

2000 წელს მომლოცველობით ჯგუფ "რადონეჟთან" ერთად მე გავემგზავრე საბერძნეთის წმიდა ადგილების მოსალოცად.

კერკირაზე წმ. სპიროდინის ტაძარში ჩვენ ვთხოვეთ მღვდელს წმიდანის წმიდა ნაწილების კანდელის ზეთი. ჩვენს ჯგუფში მიაჩნდათ, რომ ის უკეთესი იყო, ვიდრე ნაყიდი. ჩვენ ზეთს ვიღებდით შპრიცით და ვასხამდით წინასწარ მომზადებულ შუშებში. ჯგუფი დიდი იყო, იყო სიმჭიდროვე, ყველა ცდილობდა სწრაფად აეღო ზეთი და ვიღაცამ გაუფრთხილებლობით კანდელი გადააყირავა, საიდანაც ნარჩენი ზეთი დაიქცა.

ყველას ძალიან დაწყდა გული, განსაკუთრებით კი ერთ ქალს - ის რიგში ბოლო იყო და არ შეხვდა წვეთიც კი. მე გადავწყვიტე ჩემი ზეთიდან გამეყო მისთვის - და ჰოი, საოცრებავ, - იმ ქალის ცარიელი ჭურჭელი თავისით აივსო! ეს მოხდა მთელი ჩვენი ჯგუფის თვალწინ, ისე, რომ ამ სასწაულის მოწმე ბევრი ადამიანია. ჩვენ ყველანი გაოგნებული ვიყავით.

ავტობუსში ჩვენ გავიხსენეთ ამბავი, როცა წმიდა სპირიდონს თავისთავად აევსო კანდელი.

ღვთისთვის და მისი წმიდანებისთვის ყველაფერია შესაძლებელი!

ვმადლობ უფალს და წმიდა მღვდელმთავარ სპირიდონს, რომ ღირსი გამხადეს ამ დიდი სასწაულის ნახვისა!"

[marine]

"ჩემმა მეზობელმა მიამბო, რომ წაიკითხა განცხადება დაკარგული ძაღლის შესახებ, რომელიც გუშინ გვიან დაინახა. მან მაშინათვე დარეკა მითითებულ ნომერზე და პატრონებს უთხრა, რომ ნახა ეს ძაღლი გარკვეულ ადგილას.

რომ მოვისმინე ეს ისტორია, მე წარმოვიდგინე, როგორ დარბის საწყალი ცხოველი პატრონის ძიებაში და თავად პატრონებიც რა დღეში არიან. ისიც გავიგე, რომ მათი შვილები ტიროდნენ ძაღლის გამო, ძალიან განიცდიდნენ მის დაკარგვას. დავიწყე წმ. სპირიდონის მიმართ ლოცვა, რათა დახმარებოდა პატრონებს ძაღლის პოვნაში. ის ხომ ოდესღაც მწყემსი იყო და ზრუნავდა ცხოველებზე. ასევე ვთხოვე უფალს, ყოვლადწმიდა ღვთისმშობელს, წმ. ქსენია პეტერბურგელს, წმ. მოწამე ტრიფონს, წმ. ნიკოლოზ სასწაულთმოქმედსა და მფარველ ანგელოზს.

დაახლოებით ორი საათის მერე მეზობელმა მომახარა, რომ ახლახანს დაურეკეს და უთხრეს, რომ ძაღლი იპოვეს. როგორც აღმოჩნდა, ბიჭი წავიდა ძაღლის საძებნელად იმ ადგილას, სადაც წინა საღამოს ნახეს. იმ ადგილის პირდაპირ არის პარკი, საიდანაც გამოიქცა კიდეც ძაღლი მისკენ.

დიდ ქალაქში, სადაც პანიკის გამო ძაღლი შეიძლება ძალიან შორს გაიქცეს, მისი პოვნის შანსი ძალიან მცირედია. და ეს ნამდვილად სასწაულია! ურწმუნო ადამიანი იტყვის - დამთხვევაა, მაგრამ მე მჯერა, რომ ზეცაში ჩვენ ნამდვილად გვისმენენ.

დიდება შენ, უფალო!

მადლობა, რომ ასე სწრაფად დაგვეხმარე!

მადლობა ყოვლადწმინდა ღვთისმშობელს, მფარველ ანგელოზს და ყველა წმინდანს!"

[marine]

"მიუხედავად იმისა, რომ წმ. სპირიდონის ყველა სასწაული ოფიციალურად არის აღიარებული ეკლესიის მიერ და აქვს დოკუმენტური დადასტურება კუნძულ კვიპროსის ქრონიკებში, თანამედროვე ადამიანებს ძალიან უჭირთ მათი დაჯერება.

წმიდა ნაწილებიანი ლუკსუმა მდებარეობს ტაძარში ყველაზე გამოსაჩენ ადგილზე, ის მთლიანად არის შემკული ოქროს და ვერცხლის სამკაულებით - მათი ძღვენით, ვისაც წმიდანი დაეხმარა. ეს საუნჯე დაკეტილია კლიტით: მას მცველი მხოლოდ მართლმადიდებელი მომლოცველებისთვის აღებს, კათოლიკეებს კი უფლება ეძლევათ მხოლოდ ლუსკუმას ემთხვიონ.

შუშიდან კარგად შეიძლება წმიდანის სახის დათვალიერება. მისი ნაკვთები სრულებით ამოცნობადია; მშვენიერადაა შენახული თმა და თეთრი კბილები. კანი ცოტა მოჭმუჭნილი და გამუქებულია, მაგარმ მან შეინარჩუნა თავისი ფორმა. საინტერესოა, რომ ლუსკუმის მცველები ამბობენ - წმიდანის სახე დიდი ხანი არაა, რაც გამუქდა. ეს მოხდა მე-17 საუკუნეში, როცა ჩატარდა მართლმადიდებელი ეკლესიის წეს-ჩვეულებათა და საღვთისმსახურო წიგნების რეფორმა, რომელიც ჩვენთან ცნობილია "პატრიარქ ნიკონის რეფორმის" სახელწოდებით. როგორც ჩანს, ეს განმაახლებლობა წმიდანს არ ესათნოვა.

როგორც ცნობილია, წმიდანის სხეული გამუდმებით ინარჩუნებს 36.6 გრადუს ტემპერატურას. მას ეზრდება თმა და ფრჩხილები. და რაც ყველაზე გასაოცარია - შესამოსელს მას წელიწადში ორჯერ უცვლიან, რადგან ის ცვდება. თითქოს წმიდანი ლუსკუმაში კი არ იმყოფება, არამედ დადის. ლუსკუმის მცველმა თქვა, რომ იყო შემთხვევები, როცა ვერაფრით შეძლეს ლუსკუმის კლიტის გაღება. მაშინ მღვდლებმა იციან ხოლმე, რომ წმიდანი ლუსკუმაში, უბრალოდ, არაა - ის დადის კუნძულზე".

[marine]

"ჩემი ქალიშვილი სწავლობს მე-7 კლასში. მას უტარდება გეომეტრიაში ჩათვლები, განვლილი თემების მიხედვით. მას ძალიან უჭირს ეს საგანი. პირველი ჩათვლა სამიანზე ძლივს ჩააბარა, ერთად ვემზადებოდით. მეორე ჩათვლისთვისაც ერთად მოვემზადეთ, თუმცა მან მარტომ ილოცა წმ. სპირიდონის მიმართ და მიიღო "ხუთიანი". როგორებიც არ უნდა ვიყოთ ჩვენ - წმიდანი ლოცულობს ჩვენთვის ღვთის წინაშე.

გმადლობთ შენ, წმ. მღვდელმთავარო სპირიდონ!"

/ქსენია ტ./

[marine]

"წმ. სპირიდონის ხსენება ეროვნულ დღესასწაულად ითვლება კუნძულზე. იბადება კითხვა, რა არის ის საიდუმლო, რისთვისაც ასე დიდებითა და სასწაულმოქმედებით უხვად შეამკო უფალმა წმ. სპირიდონი? - ალბათ, იმ უდიდესი სიყვარულისა და უბრალოებისათვის, რითაც იგი უხვად იყო გამშვენებული. საოცარია, რომ ეს უბრალო კაცი, ცხოვართა მწყემსი, ეკლესიის დიდ მწყემსად და ნუგეშად აქცია უფალმა. განიცდი რა წმინდანთან სიახლოვეს, ფიქრობ უფალზე, როგორი დიდებულია და ამავე დროს როგორი უბრალოა იგი, რომ რწმენითა და სიყვარულით გაღებული "მსხვერპლი ღვთისა არს შესაწირი და ყოვლად დასწველი, რომელიც ღმერთმან არ შეურაცხყო"

/დეკ. იოანე (ბეკოშვილი)/

[marine]

"დღეს წმ. სპირიდონი მყისიერად შემეწია!

დილით სამსახურიდან დავეთხოვე და რაიონის ადმინისტრაციაში მივედი. ავიღე რიგის ნომერი, დავჯექი და დავუწყე ლოდინი ჩემს დროს, თუმცა ჩემს წინ ძალიან ბევრი ადამიანი იყო და როგორც ჩანს, დიდ ხანს მომიწევდა ლოდინი. არადა სამსახურში ძალიან მეჩქარებოდა.

გულში წმ. სპირიდონს ვთხოვე დახმარება და ფაქტობრივად, ერთ წუთში ეკრანზე ჩემი ნომერი აინთო - ისე სწრაფად, რომ არც ველოდი.

ასე მომენტალურად მოვიდა წმ. სპირიდონის დახმარება.

გმადლობ შენ, წმიდაო სპირიდონ! ევედრე ღმერთსა ჩემთვის.

დიდებულია ღმერთი თავის წმინდანებში!"

/მხევალი ღვთისა სვეტლანა/

[marine]

"ჩემს სამსახურში დაიწყო შემცირება, თანამშრომლებიდან ვინ სად გადაისროლეს...

მე უამრავი რამ მსმენოდა წმ. სპირიდონის სასწაულებზე. ამით შთაგონებულმა წმ. სპირიდონს წავუკითხე დაუჯდომელი სამი დღის განმავლობაში, ვლოცულობდი ჩემი სიტყვებით, ასევე ლოცულობდა ჩემი დედაც.

მე პირობა დავდე, რომ თუკი წმიდანი დამეხმარებოდა, ამ ამბავს საჯაროდ გავავრცელებდი.

ორი დღის შემდეგ სამსახურში სრულებით შეიცვალა მდგომარეობა - რაღაც საკითხების დარეგულირების შემდეგ ყველა თანამშრომელმა შეინარჩუნა ადგილი.

ამიტომ უსასრულოდ ვმადლობ ჩვენს უფალს და მის სასწაულთმოქმედ წმ. სპირიდონ ტრიმიფუნტელს, რომელსაც ვუყვარვართ და თანაგვიგრძნობს ჩვენ ცოდვილებს"

/იულია ბ./