ღვთისმშობლის ხუთგზის სალმობა-ვედრებანი პარამეტრები

[izi-bartki]

მაინტერსებს რა შემთხვევაში იკითხება "ღვთისმშობლის ხუთგზის სალმობა ვედრებანი"?შეიძლება თუ არა რომ ეს ლოცვაც,წავიკითხო ღვთისმშობლის სხვა ლოცვებთან ერთად??თუ ეს ლოცვა მხოლოდ განსაკუთრებული შემთხვევისას იკითხება? გამარკვიეთ ძალიან გთხოვთ,წინასწარ დიდი მადლობა.იზა

[დეკ. ანდრია]

რამდენადაც ვხვდები, თქენ გულისხმობთ წმიდა დიმიტრი როსტოველის მიერ შედგენილ ლოცვებს ღმრთისმშობლის ხუთი ტკივილის მოსახსენებლად. თვით ლოცვის სიტყვები მართლაც მშვენიერია და დიდად შეეწევა ყურადღებით და მონდომებით მლოცველს. მაგრამ დამაფიქრებელია დამოკიდებულება ლოცვისადმი.

ეს ლოცვა ბოლო დროს "მოდური" გახდა, ისევე, როგორც ზოგიერთი სხვა ლოცვა. არის შემთხვევები, როცა მორწმუნეები დროის ნაკლებობის გამო ტოვებენ საყოველთაოდ მიღებულ დილა–საღამოს ლოცვებს, მაგრამ აუცილებლად კითხულობენ "განსაკუთრებულ" ლოცვებს (ზოგიერთი მათგანი საგანგებოთ ვრცელდება მათი გამრავლების და გავრცელების მოთხოვნით). ასეთი დამოკიდებულება ხალხურ ოკულტიზმს (შემლოცველობას) უფრო ახასიათებს, ვიდრე მართლმადიდებლობას. ლოცვა არ არის შელოცვა. ლოცვა ყურადღებით კითხვისას ჩადის გულში, აიყოლიებს მას, ლოცვის სიტყვები შეეთვისებიან ადამიანის გულს, მის საკუთარ სიტყვებად იქცევიან. რაღაც განსაკუთრებული სტატუსის მინიჭება ცალკეული ლოცვებისათვის უფრო შელოცვებისადმი დამოკიდებულებას წააგავს. არ უნდა ვიყოთ ლოცვის სიტყვების მოიმედენი, არამედ გავითავისოდ და ვეცადოთ გულითაც ავყვეთ მათ.

დამწყები ქრისტეანისათვის დამაბრკოლებიც კი შეიძლება გახდეს ის მოკლე ანოტაცია, რომელიც ამ ლოცვას უძღვის წინ. ასე მაგალითად ვკითხულობთ: "მიუგო მას (ბერს – დეკ. ა.) უფალმა: … მეორე ტკივილის მოხსენებისათვის შევუნდობ ყველა ცოდვას". წარმოგიდგენიათ ახლადმოსული, რომელიც წაიკითხავს, რომ თურმე საკმარისია წაიკითხო ყოველდღე ეს მოკლე ლოცვა და შეგენდობა ყველა ცოდვა. მაშ რა საჭიროა აღსარება? სამწუხაროდ ვერცერთ ჩემთვის ცნობილ ლოცვანში ვერ ვნახე უფრო ვრცელი განმარტება.

კვლავ ვიტყვი, რომ ეს ლოცვები წმიდანის შედგენილია და დიდადშემწეა, მაგრამ თუ სწორად მივუდგებით და არ შევმოსავათ განსაკუთრებულობის სამოსში.