ზრახვები და ხიბლი პარამეტრები

[marine]

"ადამიანის გულს უსაქმოდ ყოფნა არ ძალუძს; ჩვენს სულს უსაქმოდ ყოფნა არ შეუძლია. თუ გონება წმიდა აზრებით არ არის დაკავებული, მაშინ ის ფუჭი ან მავნე აზრებითაა დაკავებული; თუ გულში წმიდა, ზეციური აზრები არ არის, მაშინ იგი არაწმიდაა, მღვრიე, ხორციელი აზრებით სუნთქავს; თუ ადამიანის ნება ზეცისაკენ, ღვთის წმიდა ნების აღსრულებისაკენ არ მიისწრაფვის, მაშინ იგი ცოდვის გზით ჯოჯოხეთისაკენ მიდის"

[marine]

ხიბლს საოცარი თვისება აქვს, მწვერვალებიდან ჯოჯოხეთში გაგდებს!..

/მამა პეტრე კვარაცხელია/

[marine]

"ერთმა წმიდა მამამ თქვა: "იფიქრე კეთილზე, რათა ბოროტზე არ იფიქრო, რამეთუ ბოროტ სულს უმოქმედობა არ შეუძლია". ჩვენი გონება ღვთის სიტყვაზე, გულითად ლოცვაზე და მადლმოსილი ფიქრებისაკენ უნდა მივმართოთ. ამაო ფიქრებისაგან საამო შეგრძნებები წარმოიშობა, კეთილი აზრები კი კეთილ ნაყოფს იძლევა".

[marine]

"ბუნებაზე დამკვირვებელთა აზრით, მტრედები განეშორებიან უწმინდურ ადგილს, ფუტკრებიც ვერ ჩერდებიან კვამლთან; ასევე, ღვთის მადლი განეშორება იმ გულს, რომელშიც უწმინდური ზრახვებია, და ასე ვთქვათ, ცუდი აზრები ბოლავს!"

[marine]

"განდევნე ცოდვილი აზრები ღვთის სამსჯავროს შიშით, შეამსუბუქე შინაგანი მწუხარების საქმეები მარადისობის ნუგეშით"

/წმ. ფილარეტ ჩერნიგოველი/

[marine]

" - რა მიზეზით შეიძლება, ადამიანს გაუჩნდეს უკეთური აზრები ღმერთისა და წმინდანების მიმართ?

- ამგვარ აზრებს ნუ ჩაუღრმავდებით, ეცადეთ, არ მიაქციოთ მათ განსაკუთრებული ყურადღება. რადგან ეს გაწუხებთ, ესე იგი, მათ გაჩენაში თქვენ თავად არ ხართ დამნაშავე, მით უმეტეს, თუ მათ არ ეთანხმებით. ასეთ დროს ამ აზრებს გაწვდით ბოროტი ძალა, რომლის მიზანია, ადამიანი უიმედობაში ჩააგდოს, თითქოს ის იმდენად ცოდვილია, რომ თვით სიწმიდეების მიმართაც კი მკრეხელური აზრები უჩნდება და ხელს ააღებინებს ეკლესიაში სიარულზე. დამშვიდდით და უფალს სთხოვეთ, გაგათავისუფლოთ ამგვარი აზრებისგან"

[marine]

"უფრო ღრმად ჩაიხედე საკუთარ გულში: თვითონვე დაინახავ, რომ ყოველგვარ ბოროტ ფიქრს, სურვილსა და საქმეს შენთვის სირცხვილი და აუგი მოაქვს, მიუხედავად იმისა, რომ არავინ იცის შენი აზრები, სურვილები და საქმეები. მაგრამ დადგება დრო, როდესაც ყველა ყველაფერს შეიტყობს!"

[marine]

"რასაკვირველია, არ შეგიძლია, წინ აღუდგე ჩიტის ფრენას, მაგრამ ის მაინც შეგიძლია, ხელი შეუშალო მას ამა თუ იმ ადგილას ბუდის გაკეთებაში"

[marine]

"როდესაც არაწმიდა აზრები აშფოთებენ შენს გონებას, სასოწარკვეთილებას ნუ მიეცემი, არამედ გაიხსენე ღვთის წყალობანი. ვისაც ხომალდი აბარია, მას გემის პატრონი არასოდეს უსაყვედურებს: "რატომ მიეცი ტალღებს საშუალება, რომ ჩემი გემისთვის შემოეტიათ?" არამედ ასე ეტყვის: "რატომ არ იზრუნე ხომალდზე და არ ეწინააღმდეგებოდი ტალღებს?"

/წმ. ეფრემ ასური/

[marine]

"ამაო სიტყვებიც და აზრებიც კი აკრძალულია!.. - ეს უკვე ძალიან მძიმეა", - ამბობენ ქარაფშუტები; "ზედმეტად მკაცრია!" - ფიქრობენ უგუნურნი; ზოგნი ამბობენ: "ამაო სიტყვები საზიანო არ არის და მით უმეტეს - ამაო აზრები". დიახ, პატარა მწერები, უმეტეს შემთხვევაში, შხამიანები და მომაკვდინებლები არ არიან, მაგრამ განა მოისურვებდი, მათით სავსე სივრცეში ცხოვრებას, სადაც ისინი განუწყვეტლივ თვალებში გეჩხირებიან, ყურებში გიბზუიან, გიფოქრიაქებენ გონებას და გაყენებენ ასეულობით არამომაკვდინებლ ჭრილობას?"

[marine]

"გადარჩენის იმედი არ არსებობს მათთვის, ვინც სიძვის აზრებს ეთანხმება და ტკბობას განიცდის მათით; და პირიქით, ის, ვინც არ ეთანხმება მათ და წინააღმდეგობასაც უწევს მთელი ძალისხმევით, ლოცულობს მათ წინააღმდეგ, - გვირგვინს მიიღებს უფლისაგან"

[marine]

"როგორც ვერ შეინახავ მორიელს უბეში, ასევე ნუ გააჩერებ გულში ცუდ აზრს!"

[marine]

"ზრახვებით მოწევნული განსაცდელის ჟამს მტკიცედ და ოხვრით ილოცე: "უფალო, შემწყალე!", "უფალო, ნუ დამტოვებ", "ღმერთო, შეწევნასა ჩემსა მოხედენ; უფალო, შეწევნად ჩემდა ისწრაფე!" და ამის მსგავსად, და ზრახვები ვერ დაგჯაბნიან".

[marine]

"როგორც ბნელი ხვრელიდან სინათლეზე ამომძვრალი გველი ცდილობს გაქცევასა და მიმალვას, ასევე, გულახდილი აღსარებით გამჟღავნებული ბოროტი ზრახვები ადამიანისაგან გაქცევას ცდილობენ"

/ამბა მოსე/

[marine]

"აზრებისა და გრძნობების მეტნაკლებად მიღებული სახე, არცთუ იშვიათად, მეტნაკლებად საშიშია"

[marine]

"ეშმაკს ყველაზე მეტად ლოცვა ზარავს და ადამიანს ყველაზე უკეთური აზრებიც სწორედ ლოცვის დროს ებრძვის. ამიტომაც უნდა ებრძოლოს უკეთურ აზრებს განსაკუთრებულად ლოცვის დროს"

[marine]

"ბოროტი ზრახვები ყველაზე მეტად ადამიანს ლოცვის დროს ებრძვის. თუ ამ ზრახვებს დაამარცხებს და გონებაში არ შეუშვებს, ისინი ლოცვის დასრულების შემდეგ უტევენ"

[marine]

"ვინც გონებაში შემოსულ აზრებს ეწინააღმდეგება, იმ კაცს ჰგავს, რომელიც მტერს განდევნის. მტერში დაცემული ანგელოზი, ეშმაკი იგულისხმება, ხოლო ლომებთან მებრძოლზე აღმატებული ეშმაკის განმდევნელია"

[marine]

109. ერთხელ ძმათა შესაკრებელში მივედი და შევნიშნე, რომ ერთი მოღვაწე ძმა სიძვის ზრახვებს შეეშფოთებინა. რადგან ამნ ლოცვისთვის მარჯვე, ფარულ ადგილს ვერ მიაკვლია, ბუნებრივი მოთხოვნილების დაკმაყოფილება მოიმიზეზა და მტრების წინააღმდეგ იქ ილოცა მხურვალედ. მე ვუსაყვედურე უწესო ადგილას ლოცვისთვის, მან კი მიპასუხა: "უწმინდურ აზრთა განდევნისთვის ამგვარ მყრალ ადგილას ვილოცე იმიტომ, რომ სიმყრალეს განვრიდებოდი".
/ღირსი იოანე სინელი/

ამ მაგალითიდან ჩანს, რომ მოღვაწისათვის იმდენად საშინელი უნდა იყოს სიძვის აზრები, რომ მან ნებისმიერი მეთოდი უდნა გამოიყენოს მისგან თავის დასაღწევად. მან ნებისმიერ ადგილზე შეიძლება ილოცოს იმისთვის, რომ ეს აზრები მოიცილოს.

/არქიმანდრიტი მაკარი (აბესაძე)/

[marine]

"როდესაც უკეთური აზრები შემოგვიტევს, ეს სამი ღვაწლი, - მარხვა, სიმდაბლე და ლოცვა მოვიშველიოთ. სწორედ ასე შეძლებს ადამიანი ბოროტის მანქანებისა და ხირკებისაგან თავის დაცვას"