"უდაბნოს ანგელოზი", წმინდა იოანე ნათლისმცემელი პარამეტრები

[marine]

"მისი [იოანე წინამორბედისა და უფლის ნათლისმცემელის] ქადაგება ძალიან ძლიერი იყო, მაგრამ არა მრავალსიტყვიანი".

[marine]

"იორდანე ხშირად ივსება და გადმოდის თავისი ნაპირებიდან. მისი წყალი სასიამოვნო გემოს მქონეა; ზაფხულში გამჭვირვალეა, მაგრამ შემოდგომაზე, ზამთარსა და გაზაფხულზე ხდება რუხი, მასში სწრაფი დინების გამო დალექილი თიხის ნიადაგის გამო. წყლის ტემპერატურა დაახლოებით 10 გრადუსია. ზოგიერთები ფიქრობენ, რომ წყლის ტემპერატურა ძალიან ცივია იმისათვის, რომ შეძლონ მასში ჩასვლა, მაგრამ აქამდე ათასობით მომლოცველი ბანაობს აქ ნათლისღების დღესასწაულზე ან მის წინა დღეს და, თანაც ჯანმრთელობისათვის ყოველგვარი ზიანის მიყენების გარეშე".

[marine]

"მართლაც, არც ერთი ქალისგან დაბადებული არ არის იოანე ნათლისმცემელზე დიდი; რადგან სწორედ ის არის ყველა წინასწარმეტყელის სისავსე. რადგან უფლის შესახებ ყველამ წინასწარგანჭვრიტა და მისი მობრძანება ყველამ შორიდან იწინასწარმეტყველა; მაგრამ იოანემ, რომელიც მაცხოვრის შესახებ წინასწარმეტყველებდა, იგი უშუალოდ ყველას თვალწინ წარადგინა, შეჰღაღადა და თქვა: აჰა, ტარიგი ღმრთისა, რა ტკბილი და მშვენიერია ის ხმა, რომელიც პირდაპირ იმაზე მიუთითებს, რასაც ქადაგებს! დედისაგან შობილი არვინ აღმდგარა იოანე ნათლისმცემელზე უმეტესი, ხოლო ცათა სასუფეველში უმცირესიც მასზე უმეტესია. ესენი არიან ღვთისაგან კვლავ დაბადებული მოციქულები, რომლებმაც ნუგეშინისმცემელი სულის პირველი ნაყოფი მიიღეს; განკითხვის ღირსნი ქრისტესთან ერთად იქმნენ, ტახტზე ქრისტეს თანამყოფები და ადამიანთა გამომხსნელები გახდნენ. ასევე ნახავ, რომ ისინი (როგორც მოსე) ბოროტი ძალების ზღვას გააპობენ, და ერთგულ სულებს გამოიყვანენ; ნახავ ასევე, რომ ისინი სულიერ ყურძენს ამუშავებენ; ნახავ, რომ ისინი სიძის მეგობრები და სულიერად ქრისტეს მიერ დანიშნულები არიან; რადგან დაწერილია: ვინაიდან დაგწინდეთ ერთ კაცზე; ასევე ნახავ, რომ ისინი ადამიანებს სიცოცხლეს აძლევენ; ერთი სიტყვით, შენ აღმოაჩენ, რომ სულს ისინი მრავალი მიმართულებით და მრავალმხრივ ემსახურებიან. აი, ეს ყველაფერს გრძნობდა, ხედავდა და ეს ყველაფერი აწუხებდა იოანე ნათლისმცემელს"

/წმ. მაკარი დიდი/

[marine]

"გიხაროდენ, იესუისა მაცხოვანებელისა მის გზისა განმამზადებელო და ყოველთა მათ დიდთა წინასწარმეტყუელთა უზეშთაესო, წინამორბედო და ნათლისმცემელო უფლისაო იოანე!"

[marine]

"მარადიული მზის - იესო ქრისტეს ამობრწყინებას წინ უსწრებდა ცისკრის მნათობი, იოანე ნათლისმცემლის სახით"

[marine]

"ტროპარი: წინა-მორბედო და ნათლის-მცემელო იოანე, უდაბნოსა მოქალაქეო, რომელსა გესმა საღმრთო იგი ხმა მამისა, რომელი ღირს-იქმენ ძისა და უფლისა ნათლის-ცემად და იქმენ მხილველ სულისა წმიდისა, და ყოველთა გვიქადაგე ნათლისღება სინა-ნულისა, ჩვენ ცოდვილთაცა მეოხ-გვეყავ, რათა ლოცვითა შენითა მოვიღოთ შენდობა ცოდვათა"

[marine]

"იოანე ნათლისმცემლის თავის მოკვეთისთვის ვერცერთი გადაურჩა ღვთის სასჯელს: სალომეა ყინულებს შუა ჩავარდა, როცა მდ. სიკორისზე გადადიოდა ზამთარში. ყელს ზევით ყინულების ზევით იყო, დანარჩენი ტანი წყალში ჰქოდა და მანამ იფართხალა, ასე, სანამ ყინულმა არ წააწყვიტა კისერი. გვამი ვერ იპოვნეს, თავი კი ისევე მიართვეს ჰეროდესა და ჰეროდიადას, როგორც ადრე იოანე ნათლისმცემლის თავი მოართვეს თვით სალომეას".

[marine]

"დამასკოში მდებარეობს მსოფლიოში ერთ-ერთი ცნობილი ომაიდების მეჩეთი. მეჩეთის აღმოსავლეთ ნაწილში განთავისუფლებლია იოანე ნათლისმცემლის სამლოცველო. მუსლიმანთა გადმოცემით, აქ ინახება იოანე ნათლისმცემლის თავის ნაწილი. ამბობენ, რომ ხალიფა ვალიდს უნდოდა მოეშალა სამლოცველო, თვითონ შეუდგა სამუშაოს, მაგრამ მოძრაობის უნარი დაკარგა. ამის შემდეგ სიწმინდეს ხელი არ ახლო"

[marine]

"ღვთის სამსჯავრო ჰეროდეს, ჰეროდიადასა და სალომეასთვის მათი მიწიერი ცხოვრების დროსვე აღესრულა. სალომეას ზამთარში, მდინარე რიკორისზე გადასვლის დროს, ყინული ჩაუტყდა და ქვეშ მოექცა. ყინულმა იგი ისე ჩაიჭირა, რომ ტანით წყალში იყო ჩაკიდული, თავი კი ყინულის ზემოთ ჰქონდა დარჩენილი. ასე ეკიდა მანამ, სანამ ბასრმა ყინულმა კისერი არ გადაუჭრა. გვამი ვერავინ იპოვა, ხოლო თავი კი, როგორც ოდესღაც წმინდა იოანე ნათლისმცემლისა, ჰეროდესა და ჰეროდიადას მიუტანეს. არაბეთის მეფე არეთამ, თავისი ქალიშვილის შერცხვენისთვის შური რომ ეძია, ჰეროდეს წინააღმდეგ გაილაშქრა. ჰეროდე დამარცხდა. განრისხებულმა გაიუს კალიგულამ (37-41) იგი შეიპყრო და ჰეროდიადასთან ერთად ჯერ გალიაში, შემდეგ კი - ესპანეთში გადაასახლა, სადაც ისინი უეცრად გაპობილ მიწაში დაინთქნენ".

[marine]

როგორ მოინათლა ათეისტი წმ. იოანე ნათლისმცემლის მეოხებით

"როცა მე ვიგრძენი, რომ არ შემიძლია ცხოვრება რწმენის, ღმერთის გარეშე, სწორედ მაშინ გამიჩნდა ახალი პრობლემები: ჩემი ქმარი მოუნათლავი, ურწმუნო იყო და ყველანაირად ეწინააღმდეგებოდა ჩემს ეკლესიურ ცხოვრებას. ერთი ნაცნობის რჩევით მე დავიწყე ლოცვა წმ. იოანე ნათლისმცემლის მიმართ, რათა ის დახმარებოდა მეუღლეს ნათლობაში. მე ვერც კი წარმომედგინა, თუ როგორ შეიძლებოდა ეს მომხდარიყო, რადგან ქმარი ნამდვილი ათეისტი იყო.

რა თქმა უნდა, მსოფლხედვა უცება არ იცლება. მე მეჩვენებოდა, რომ ლოცვას არ მოაქვს შედეგი. ოჯახში უთანხმოება გრძელდებოდა. დავკარგე რა იმედი, მე წავედი ელესიაში, რათა კურთხევა მეთხოვა მღვდლისგან გაყრაზე, მაგრამ მოძღვარმა არ მომცა ასეთი კურთხევა, არამედ მითხრა, დავერჩენილიყავი მსახურებაზე და უფლისთვის მეთხოვა გულისხმისყოფა, თუ როგორ მოვქცეულიყავი. მე მხურვალედ ვილოცე. სახლში მიმავალი სულ ვფიქრობდი: მაშ რაზე მიმითითა უფალმა?

სულ მალე სამსახურიდან დაბრუნდა ქმარი და გამომიცხადა, რომ მიიღო გადაწყვეტილება, მონათლულიყო და თან დაამატა - ამას ჩემთვის კი არა, საკუთარი სურვილით აკეთებდა.

განა ეს სასწაული არაა? რა მოხდა ჩემი მეუღლის გულში იცის მხოლოდ ღმერთმა. მთელი ოჯავი ვესწრებოდით უფლის ამაღლების ტაძარში მის ნათლობას.

მხოლოდ უფლის დიდებული წინასწარმეტყველის, წინამორბედისა და ნათლისმცემლის იოანეს მეოხებითა და სამღვდელო კურთხევის მადლმოსილი ძალით შემიძლია ავხსნა ეს სასწაული ამბავი".

[marine]

"სიტყვებით: "არამედ რაისა გამოხუედით ხილვად წინასწარმეტყუელისა? ჰე, გეტყვი თქუენ, და უმეტეს წინასწარმეტყუელისა" - ძე ღვთისა წარმოაჩენს იოანე ნათლიმცემლის უპირატესობას ძველი ათქმის ყველ წინასწარმეტყველთან შედარებით; ანუ ეს წმინდანი ადამინური შესაძლებლობების ზღარზე იღვწოდა"

[marine]

"შემდეგ იესო კიდევ უფრო იდუმალ რამეს ამბობს: "ამენ გეტყვი თქუენ: არა აღდგომილ არს ნაშობთაგანი დედათაი უფროის იოვანეს ნათლის-მცემელისა; ხოლო უმცირესი სასუფეველსა ცათასა უფროის მისა არს".

რას უნდა ნიშნავდეს ეს იდუმალი სიტყვები?

იმას, რომ ქრისტეს სიტყვით განბანილი ქრისტიანი უფრო მაღლა დგას ნებისმიერ არაქრისტიანზე, რომელიც სჯულის დაცვით ცდილობს ცხონებას. ნეტარი ავგუსტინე ამბობს: "მთელი კანონი შესრულებლია მაშინ, როდესაც ყველა ცოდვა მიტევებულია".

ძველი აღთქმის წმინდანს, თუნდაც იოანე ნათლისმცემელს, ყველაფრის შესრულება არ შეუძლია. წინააღმდეგ შემთხვევაში მას არ დასჭირდებოდა ქრისტე, როგორც ღვთის ზვარაკი, რომელმაც სამყაროს ცოდვები თავის თავზე აიღო; ხოლო ქრისტეს მიერ შეწყალებული ახალი აღთქმის ცოდვილი მადლით თვით იოანე ნათლისმცემელზე მაღლა დგას. მართლმადიდებელი ეკლესია გვასწავლის, რომ პირველქმნილი ცოდვის გამოსყიდვა ღვთისმშობელსაც კი სჭრიდებოდა. მიუხედავად იმისა, რომ პირადი ცოდვები არ ჰქონდა, მემკვიდრეობით მიღებული პირველყოფილი ცოდვისგან საკუთარი ძალისხმევით განთავისუფლება არ შეეძლო"

/პროტოპრესვიტერი ოლეგ სტენიაევი/

[marine]

"იოანეს საკვები უხეში და ძნელად მოსაპოვებელი იყო. პურს არ ჭამდა, ღვინოს არ სვამდა. ქრისტე კი, ჩვეულებრივ, საკვებს მიირთმევდა, პურსაც ჭამდა და ღვინოსაც სვამდა. ამგვარად, მათი ცხოვრების წესი სრულიად განსხვავებული იყო. მაგრამ იუდეველებს არც ერთი მოსწონდათ და არც მეორე; იოანეზე, რომელიც არც ჭამდა და არც სვამდა, ამბობდნენ, რომ მასში ეშმაკია ჩასახლებული, ქრისტეს კი, რომელიც ჭამდა და სვამდა, ჭამა-სმის მოყვარულს უწოდებდნენ"

/პროტოპრესვიტერი ოლეგ სტენიაევი/

[marine]

"მაშ ასე, აქ ვხედავთ, რომ იოანე ნათლისმცემელმა გაგზავნა თავისი ორი მოწაფე საკითხავად: "შენ ხარა მომავალი იგი, ან სხუასა მოველოდით?" რასაკვირველია, იოანე ნათლისმცემლის ამ სიტყვებში იესო ნაზარეველის მესიობაში ეჭვის შეტანის მინიშნებაც კი არ უნდა დავინახოთ. ადამიანს, რომელმაც იორდანზე მოისმინა თვით მამა ღმერთის მოწმობა თავისი ძის შესახებ, უფალი იესო ქრისტეს მისიაში ეჭვის შეტანა არ შეეძლო. მაგრამ ეჭვი იოანე ნათლისმცემლის მოწაფეებს, ე.წ. "იოანიტებს" შეეპარათ.

ნეტარი იერონიმე სტრიდონელი წერს: "იოანე კითხულობს არა როგორც უცოდინარი, რადგან უცოდინრებს მან თავად მიუთითა: "აჰა, ტარიგი ღმრთისაი, რომელმან აიხუნეს ცოდვანი სოფლისანი". მას გაგონილი ჰქონდა მამა ღმერთის სიტყვები: "ესე არს ძე ჩემი საყუარელი, რომელი მე სათნო-ვიყავი", არამედ თავისი მოწაფეები ქრისტესთან გაგზავნა, რათა მათ საკუთარი თვალით ეხილათ ნიშნები და ძალა, ერწმუნათ მისი და თავისი მოძღვრის შეკითხვით თავად დარწმუნებულიყვნენ".

ნეტარი თეოფილაქტე იზიარებს ამ თვალსაზრისს და წერს: "იმიტომ კი არ ეკითხება იოანე, რომ ქრისტეს ვერ ცნობს, რადგან როგორ შეეძლო ვერ ეცნო ის, ვის შესახებაც დაამოწმა: "აჰა, ტარიგი ღმრთისაი". მაგრამ, რადგანაც მის მოწაფეებს ქრისტესი შურდათ, მასთან წარგზავნა, რათა სასწაულები ეხილათ და ერწმუნათ, რომ ქრისტე იოანეზე დიდი იყო". იოანე დიდებას თავითვის კი არ ეძებს, არამედ ქრისტესთვის. საპყრობილეში მყოფი, ჰეროდესგან სიკვდილის მომლოდინე, კარგად ხედავს ძველი აღთქმის დასასრულსა და ახალი აღთქმის ერის დასასწყისს"

/პროტოპრესვიტერი ოლეგ სტენიაევი/

[marine]

იოანე ნათლისმცემელი
(ბალადა)

" - ღვინით მორიგი შეუვსე თასი,
მზად იყავი და ნიშანს ელოდე.
დადგა ჩემი დრო, დღესაა შანსი,
აჰა, ღორივით დათვრა ჰეროდე."

ის როცა თვრება, ვნებააშლილი,
უგნურ პირობებს იძლევა უხვად.
ამით სარგებლობს დედა და შვილიც
მის დავალებებს ასრულებს უხმოდ.

"მიდი,სალომე, იცეკვე ისე,
როგორც აქამდე არ გიცეკვია!"
აცუნდრუკდება ჰეროდე ისევ,
მეფე კი არა, ძაღლის ლეკვია.

როკავს და როკვის დგას აპოგეა,
მთელ სასახლის კარს გოგო აოცებს.
" - რაც გინდა მთხოვე, ო სალომეა,
ჩემი სამეფოს ნახევარს მოგცემ..."

აჰა, თქვა სიტყვა მეფემ "დიადმა"
და ნათქვამს ხომ არ წაიღებს უკან?!
კმაყოფილია ჰეროდიადა,
ქმრის მოღალატე, ეშმაკი ძუკნა.

დარიგებულმა დედის, იმთავით,
იცის სალომემ რა უნდა სთხოვოს -
" - ნათლისმცემელის მოჭრილი თავი,
სხვა არაფერი, ეს მინდა მხოლოდ"...

იცინის ეშმა, მიდის ჯალათი,
კარის გაღების ხმა ისმის საკნის.
გარინდულია მთელი პალატი
და თვით სიმართლე შემოჰყავთ ლანკნით"

/ირაკლი ასლანიკაშვილი/

[marine]

"მოსანათლად ხელის დადებისას სულ ერთიანად კრთოდა იოანე წინამორბედი"

/ღირსი ნილოს ათონელი, მირონმდინარე/

[marine]

"რატომაა ნათქვამი: უდაბნოში გაჰყვირისო წინამორბედი?

დიახ გაჰყვირის, მაგრამ რას გაჰყვირის?!

იგი გაჰყვირის და ამბობს: "შეინანეთ, რამეთუ მოახლოებულ არს სასუფეველი ცათა";

და რას ნიშნავს ეს სიტყვები?!

ცის სასუფევლის მოახლოება ნიშნავს, რომ უფალმა ღმერთმა, რომელმაც იხილა ურჩი ადამიანები, წმიდა სამებამ კი მოინდომა გაეგზავნა მათთან თავისი საყვარელი, მხოლოდშობილი ძე, ვინძლო მისი მაინც რომ მორიდებოდათ და დამორჩილებოდნენ!"

/ღირსი ნილოს ათონელი, მირონმდინარე/

[marine]

"უდაბნოს უხეში სამოსი აცხადებს იმას, რომ იგი არ არის განცხრომის კაცი"

/მიტროპოლიტი ზოსიმე/

[marine]

"სახარებიდან სრულიად ნათლად ჩანს: ჰეროდეს რომ ჰეროდიასთვის არ დაეთმო და სინდისის კარნახით, ღვთის სჯულისაებრ მოქცეულიყო, იგი სრულიად სხვა ადამიანად იექცეოდა, შესაძლოა ქრისტესთვის წამება მიეღო და წმინდანი გამხდარიყო. მას შეეძლო ამგვარი ფერისცვალება განეცადა. რამეთუ ღვთის ხატი, თვით ასეთი გაუკუღმართებულიც კი, არ განქარდება და ასეთ საშინელ ადამიანსაც აქვს გამოსწორებისა და ცხონების შესაძლებლობა. იოანემ იცოდა ეს, უყვარდა ჰეროდე და მის ხსნას ცდილობდა"

/დეკ. ალექსი უმინსკი/

[marine]

"უფალმა ყველა წინასწარმეტყველზე მაღლა დააყენა ნათლისმცემელი. მაგრამ იმისთვის რომ ვინმეს არ ეფიქრა, რომ იესო ქრისტეზე მეტიც იყო იგი, მან იქვე ბრძანა: "ხოლო უმცირესი სასუფეველსა ღვთისასა, უფროის მისსა არს". ამ სიტყვების აზრი ასეთია: თუმცა მე იოანეზე ნაკლებად მთვლით ასაკითა და ღირსებით, მაგრამ ცათა სასუფეველში, ღვთიურ ღირსებასა და პატივში, მე ვარ მასზე ბევრად მეტი. და ყველა, ვინც კი მოისმინა უფლისგან ნათლისმცემელზე თქმული, ადიდებდა ღმერთს, რადგან განადიდა მათგან აღიარებული წინასწარმეტყველი და იოანეს სინანულის ნათლისცემით იღო ნათელი".

/მიტროპოლიტი ზოსიმე/