საღვთო დღესასწაულების მიზანი, :) პარამეტრები

[marine]

ფერისცვალება

"თაბორის მთა, რომელიც უფლის ფერისცვალებით არის განთქმული, თავისი მდებარეობისა და სიდიადის გამო, ერთ-ერთი ყველაზე გამორჩეული მთაა არა მხოლოდ პალესტინაში, არამედ მთელ დედამიწაზე".

[marine]

ფერისცვალება

"პეტრეს სიტყვები: "კეთილ არს ჩუენდა აქა ყოფა" გამოხატავს მოწაფეთა უდიდეს სურვილს უსასრულოდ გაგრძელდეს ფერისცვალების დრო, როგორც ზეციური სასუფევლის სიხარული, მაგრამ ეს ასე არ ხდება. რადგან სასუფევლის დასამკვიდრებლად საჭირო იყო ცხოვრებისეული თავგანწირვა, მოციქულებრივი ღვაწლი და მოწამეობრივი სიკვდილი. მაცხოვრისათვის თაბორი წინ უსწრებს გოლგოთას, ხოლო ქრისტიანისათვის გოლგოთა წინ უსწრებს თაბორს".

[marine]

"საერთოდ, საეკლესიო დღესასწაულები საეროსგან სწორედ იმით განსხვავდება, რომ ისინი ყოველწლიურად ისეთივე სიკაშკაშით გამოირჩევიან, როგორც პირველშობისას. სულ სხვაა საერო დღესასწაულები. რამდენი ღირსშესანიშნავი თარიღი შემოუნახავს კაცობრიობის ისტორიას, დროთა მსვლელობაში რომ გაფერმკრთალებულან, ფერი უცვლიათ. საეკლესიო დღესასწაულთა განცდა კი მორწმუნეთა გულებში კვლავ ინარჩუნებს პირვანდელ ბრწყინვალებას".

[marine]

მირქმა

"განეშორა უფლის ანგელოზი და წმინდა სვიმეონისთვის დრო თითქოს გაჩერდა. სული მისი გადასახლდა ღვთის სამყაროში, დროისა და სივრცის მიღმა".

[marine]

მირქმა

"წმინდა სვიმეონი მალევე გარდაიცვალა. აღესრულა წმინდა ანაც. გარდაიცვალნენ მართალნი ღვთისანი და აბრაამის წიაღში განისვენეს. ისინი იყვნენ დასასრულნი სჯულისა და დასაბამნი მადლისა, ნათესავით ჰურიანი, გარნა მადლითა ქრისტიანენი. ნეტარ იყვნენ თვალნი მათნი და ხელნი მათნი, მხილველნი და მტვირთველნი ყრმა იესოსი.. ნეტარ ვარ მე და შენც, ჩემო მკითხველო, რამეთუ "შენც გინახავს მაცხოვარება ღვთისა არანაკლებად, ვიდრეღა სვიმეონ მართალსა. მან მხოლოდ ჩვილი იესო იხილა, შენ კი სულიერითა თვალითა და სარწმუნოებითა გიხილავს იესუ ქრისტე, აღმასრულებელი ჩვენისა ცხოვრებისა, ჯვარცმული, აღდგომილი მკვდრეთით, და თვით მისი სისხლი და ხორცი მიგიღია".

[marine]

"დღესასწაული იმისათვის როდია, რომ უწესოდ მოვიქცეთ და ცოდვები გავიმრავლოთ, არამედ იმისათვის, რათა განვიწმინდოთ მათგანაც, რაც გვაქვს!"

/წმ. იოანე ოქროპირი/

[marine]

"დღესასწაული უქმე როდია, არამედ დღესასწაულია, ე.ი. საამო ზეიმი სულისა ღვთის უდიდეს წყალობათა შესაცნობად"

[marine]

ამაღლება

"ქრისტემ, როგორც თავისი აღდგომით შემუსრა ჯოჯოხეთის კარი და მორწმუნეებს გაუხსნა მისგან გამოსასვლელი გზა, ასევე თავისი ამაღლებით მან გააღო ზეცის კარი და მორწმუნეებს მასში შესასვლელი გაუხსნა"

[marine]

ამაღლება

"მაცხოვარი ზეცად ამაღლდა, მაგრამ მოწაფეებს არ განშორებია, მიეფარა მათ თვალებს, მაგრამ მათ გულებს მიეახლა"

[marine]

ბზობა

"ქრისტეს მთელი მიწიერი ცხოვრების განმავლობაში დიდებით შესვლა იერუსალიმში იყო ერთადერთი თვალხილული დღესასწაული".

"დიდებით შესვლა იერუსალიმში ნიშნავდა ძალისა და იძულების ძალაუფლების ერთხელ და სამუდამოდ მოკვეთას, აღმოფხვრას იმ წარმავალი ძალაუფლებისა, რომელიც თავის შესანარჩუნებლად მუდმივ და განუწყვეტლივ ქებას საჭიროებს".

[marine]

"საერო დღესასწაულებზე იხარჯება ის, რაც შრომის დღეებშიი იქნა მოგროვილი; საეკლესიო დღესასწაულებზე, შეიძლება, და საჭიროა, მოაგროვო სიბრძნის სულიერი საუნჯე - ჭვრეტითი და საქმიანი, ისევე უხვად, როგორც - არასადღესასწაულო დღეებში".

[marine]

"არავის აქვს საბუთი, უსაყვედუროს ქართველს, რომ მას არ ახსოვს თავისი უმთავრესი სალოცავი დღეობები, გულგრილად ეკიდება მათ და არ დაიარება სალოცავებშიო. არა, ამ საგნის შესახებ საყვედური სრულიად უსაფუძვლო და უსამართლო იქნება. ქართველ ხალხს დღესაც მტკიცედ ახსოვს, როდის, რა ღირსშესანიშნავი დღეობა მოდის და დიდი ერიც ესწრება ხოლმე ამგვარ დღეობას. საკითხავი მხოლოდ ის არის, რისთვის, რა საქმისთვის მოდის ხალხი სალოცავში, - რასაკვირველია, პირჯვრის დასაწერად, ლოცვა-ვედრებისთვინაო, - ბრძანებთ მრავალნი. დიაღ, კარგი და პატიოსანი, მაგრამ, თუ ეს მართლა ესეა, რატომ წირვის დროს მაინც არ შემოდის ეს ამოდენა ხალხი ეკლესიაში და არ ისმენს შესაფერისი კრძალულებით ლოცვა-გალობათა? რას ნიშნავს ეს: რაღაც უზრდელად, მეტისმეტი კადნიერებით და თავხედობით რამდენიმე წუთით შემოვარდნა ეკლესიაში და მერე ისევ გავარდნა კარზე. რა არის ესოდენი უზომო სმა და ჭამა, სიმღერა, შეუსაბამო ხუმრობა, დაუღალავ-განუწყვეტელი ცეკვა, ახირებული სიცილი და სხვა. თუ ხალხი მოდის ხატის კარს სალოცავად, მაშ, რაღად გაისმის ეს საზიზღარი და საზარელი ხმაურობა ზურნისა, რომელიც ყველა ჩვენგანს უნდა გულით გვძულდეს და გვეზიზღებოდეს, რადგანაც ძველ დროში ამ ხმაურობის გაგონება მოასწავებდა ჩვენი ტაძრების, ჩვენი ციხე-სიამგრეების, ჩვენი ქალაქების, სოფლებისა და მამა-პაპათა საფლავების აკლება-განადგურებას თათრებისაგან. არა, ასეთ ურიგობაში, არეულობაში, ასეთ ყოველ ზომერებასგადასულ დროსტარებაში ლოცვას სრულებით ალაგი არა აქვს და, მართალი უნდა ვთქვათ, არც არავინ ფიქრობს მასზედ, ხალხი მოსულა ღვთის გასარიხსებლად და არა - სალოცავად. სწორედ ამგვარი დღესასწაულების შესახებ ბრძანებს უფალი: "მოვიძულენ და განვიშორებ დღესასწაულთა თქუენთა და არ ვიყნოსო კრებათა შინა თქუენთა". ასე, მოვდივართ ვითომდა ღვთის საამოდ, ღვთის კურთხევის მისაღებად და ნამდვილად კი ვიძენთ მის წყევა-ყვედრებას; მივდივართ ხორციელი და სულიერი სიკეთის მოსაპოვებლად და ნამდვილად კი ვიძენთ ათასგვარ ბოროტება-სიავეს, მოვდივართ, ვითომდა ეკლესიების სარგებლობისათვის და საქმით კი დიდი ზარალის, მისი ეზო-კარმიდამოს გაბინძურება-შებილწვის მეტს არას ვარგივართ მას".

/ეპისკოპოსი ლეონიდე ოქროპირიძე/

[marine]

"დღესასწაული სულიერი სიხარულის, მასში გულითადი მონაწილეობის, შინაგანი გრძნობის გარეშე იგივეა, რაც - სხეული სულის გარეშე"

[marine]

"თუ სადღესასწაულო დღეებში საყოფაცხოვრებო საქმეები უნდა შეწყვიტო, მაშინ, მით უმეტეს, უნდა განეშორო საქმეებს, რომლებიც სამუშაო დღეებშიც კი დაუშვებელია"

[marine]

"ნათელი დღეები ნათელია მხოლოდ სუფთა და შეუბღალავი სულისათვის"

[marine]

ამაღლება

"ქრისტე ზეცაშია! ქრისტე დიდებულია! რა სიხარული, როგორი ზეიმი აქვთ ანგელოზთა!"

[marine]

ამაღლება

"ქრისტე ზეცაშია. იქ, ზეცაშივეა ჩვენი სამშობლოც, იქ არის ჩვენი ცხოვრებაც ქრისტესთან ერთად".

[marine]

ამაღლება

"სამი უჩვეულო სასწაული, ჟამიერების დასაბამიდან უცნობი და ჩვენ ბუნებაზე აღმატებული, თანაშეიწნა და ჰგიეს დაურღვევლად და შეურყევლად, რადგან სამკეცი თოკი ადვილად არ გაწყდება. ესენია: უქორწინებელი დედის მშობიარობა, სამდღიანი ვნებისაგან აღდგომა და ხორცის ცათა მიმართ ამაღლება"

/წმ. იოანე ოქროპირი/

[marine]

სულთმოფენობა

"დღევანდელ დღეს ეწოდება ასევე წმინდა ეკლესიის დაბადების დღე, ვინაიდან სულთმოფენობიდან იწყება წმინდა ეკლესიის არსებობა; ეკლესიისა, რომელზეც უფალი იესო ქრისტე ბრძანებს: "ჯოჯოხეთის ბჭენიც კი ვერ მოერევიან მას".

ამიტომ ჩვენ განსაკუთრებით აღვნიშნავთ სულთმოფენობის დღეს. რატომ? იმიტომ, რომ ქრისტეს ეკლესია არ გახლავთ მხოლოდ ქრისტეს სხეული; უფრო სწორად, ის ქრისტეს მისტიკური და სულიერი სხეულია, მაგრამ ეკლესია არის ასევე სხეული, რომელშიც მოქმედებს და სუფევს სულიწმიდა! ამიტომ აღვნიშნავთ სულთმოფენობას ასე განსაკუთრებით!"

/მეუფე შიო მუჯირი/

[marine]

ამაღლება

"უფალმა იესო ქრისტემ თავისი ამაღლებით გაგვიხსნა ზეცა, დაგვიბრუნა ჩვენი ადგილი ზეცაში და როგორც პავლე მოციქული ბრძანებს, იგი გახდა წინამორბედი ჩვენი, ვინაიდან ზეციურ წმინდათა წმიდაში შებრძანდა, როგორც ჩვენი წინამორბედი!"

/მეუფე შიო მუჯირი/