კითხვა პარამეტრები

[ulvashi]

დამლოცე, მამაო
ახლახანს იყო ნათლისღების დღესასწაული და მაქვს ერთი შეკითხვა მაგასთან დაკავშირებით
აქამდე რამდენიმე წლის განმავლობაში სისტემატურად, ყოველ ნათლისღება ღამეს ჩავდიოდი მდინარეში. მღვდელი ლოცვას კითხულობდა და მრევლი 12 საათზე ჩავდიოდით და სამჯერ ვყვინთავდით და ამოვდიოდით.
წელს აღარ წავსულვარ, რადგანაც ერთ-ერთმა მღდელმა თქვა, რომ ეს არის რუსული ტრადიცია და სხვა არცერთ ქრისტიანულ ქვეყანაში მსგავსი არ ხდება
მაინტერესებს: ეს წესია, ტრადიციაა თუ რაა. თუ ტრადიციაა, მაშინ საეკლესიო ტრადიციაა თუ რომელიმე ერის ტრადიცია?
გმადლობთ

[დეკ. ანდრია]

სადაურიც არ უნდა იყოს წესი – რუსული, ბერძნული, ეთიოპური, ჩვენ შეგვიძლია მივიღოთ ის, რაც კეთილია და უკუვაგდოთ ის, რაც მიუღებელია. რაღაცის უკუგდება იმის გამო, რომ ის რუსულია, საკმაოდ საშიში და მართლმადიდებლობისათვის უცხო მიდგომაა. ასეთი საკითხები უნდა შევათანხმოთ სულიერ მოძღვართან.

სასწაულთმოქმედი ხატების გამოჩინების ან სხვა სასწაულის აღსრულების ადგილას არაერთხელ აღმოცენებულა წყაროები, რომლებშიც განბანვით კურნებები აღსრულებულა. აქედან იღებს დასაბამს წმიდა წყაროებში განბანვის ან მათი წყის სხურების და დალევის წესი. ამ მხრივ ჩვენში ყველაზე ცნობილი არის წმიდანი ნინოს წყარო. სასწაულები აღესრულებოდა კომანშიც, წმიდა ბასილისკოს აღსრულების ადგილას (ამის მოწმე მე თავად ვარ). სამწუხაროდ დღეს ეს წმიდა ადგილი ჩვენთვის მიუღწეველია, რადგან აბხაზეთში მდებარეობს. განბანვა არ არის მხოლოდ რუსული ტრადიცია, თუმცა რუსებში ყველაზე მეტია მსგავსი წყაროები. ახლადნაკურთხ წყალში შესვლაც იმავე რწმენის გამოვლინებაა. ვფიქრობ, აჯობებს ვენდოთ პატრიარქს, იერარქებს, მოძღვრების უმრავლესობას, რომელთაც არასდროს გამოუთქვამთ უარყოფითი დამოკიდებულება მსგავსი მოქმედებების მიმართ.