მორწმუნე ანთებულ სანთელს უნდა ბაძავდეს პარამეტრები

[marine]

"იმ შესაწირთა და მსახურებათა შორის, რომლითაც ქრისტიან კაცს ღმრთისადმი ერთგულებისა და სასოების გამოხატვა შეუძლია, ეკლესიაში ძველთაგანვე ხატთა წინაშე წმინდა სანთლის ანთებაა მიღებული. ამით ქრისტიანი ღმერთს უდასტურებს, რომ მისი გულიცა და სულიც უფლის ერთგულებით, სიყვარულითა და სასოებითაა ანთებული.

ზოგჯერ ადამიანები ცდილობენ, უფალთან "კომერციული ურთიერთობა" დაამყარონ. მაგალითად, "ღმერთო, ესა და ეს თხოვნა შემისრულე და ეკლესიაში ყველაზე დიდ სანთელს დაგინთებო". უფალს ჩვენგან არც დიდი სანთელი უნდა და არც პატარა, - შემოქმედს ჩვენი მოყვარული გულის ხილვა სურს. სანთელი კი არის ნიშანი იმისა, რომ შეგვწევს ძალა, სულიერისთვის მატერიალური გავიღოთ."

[marine]

"სანთელს რამდენიმე სიმბოლური მნიშვნელობა აქვს: ვიხდით რა მის საფასურს (თუ თვითონ ვამზადებთ), ჩვენი შრომის ნაწილს ნებაყოფლობით ვწირავთ უფალს და მის საყდარს.

ხატის წინ დანთებული სანთელი ღვთისადმი სითბოსა და ცეცხლოვანი სიყვარულის სიმბოლოა; ეს არის გამოხატულება რწმენისა და წმინდანების სახელზე აღვლენილი სავედრებელი ლოცვისა.

ცვილის სირბილე და მოქნილობა სინანულის, ღვთის მორჩილებისთვის მზადყოფნის სიმბოლოა, სანთლის სისუფთავე კი მისი შემწირველის სისუფთავისა და წაუბილწაობის გამომხატველია.

სასანთლე ცვილს ფუტკარი სხვადასხვა სახის ყვავილებისა და მცენარეებისაგან ამზადებს, რაც სიმბოლურად ყველა მორწმუნე ადამიანის ერთ ეკლესიად შეკრებასა და ღვთაებრივ ცეცხლად ანთებას, აგრეთვე ყველა ქმნილების მიერ თავისი შემოქმედისთვის მირთმეულ ძღვენს ნიშნავს. ამ თვისებათა გამო ცვილი საუკეთესო შესაწირია; მისგან სანთლებს უკვე III საუკუნიდან ამზადებდნენ.

ანთებული სანთელი მიწიერი ადამიანის ღვთის სიყვარულისა და მისი უსაზღვრო მადლის მეშვეობით ახალ ქმნილებად ქცევის სიმბოლოა. ჩვენი ამქვეყნიური სიცოცხლეც ანთებულ სანთელს უნდა წააგავდეს, რომელიც თვითონ იწვის და სხვას გზას უნათებს.

სანთელი სიმხურვალისგან დნება და იკარგება. ასე იფერფლება ჩვენი მიწიერი ცხოვრებაც ჟამთა სიავის გამო. ზოგიერთი ჩვენგანის ცხოვრება უკვალოდ ქრება, ზოგიერთისა კი ანათებს, სითბოს იძლევა და ცამდე მაღლდება, სადაც მის მფლობელს ჭეშმარიტი სიმდიდრე ელის.

მორწმუნე ანთებულ სანთელს უნდა ბაძავდეს. არც ერთი მისი ფიქრი, სიტყვა და საქმე არ უნდა იყოს დაფარული უფლისგან და მას ერთადერთს ეძღვნებოდეს.

დაბოლოს, ანთებული სანთელი სიმბოლოა ჯოჯოხეთზე გამარჯვებული ეკლესიისა, მისი მარადიული ზეიმისა.

სასანთლეს, შანდალს სანთლების რაოდენობის მიხედვით სხვადასხვა მნიშვნელობა აქვს. ერთსანთლიანი იესო ქრისტეს ან იმ წმინდანს აღნიშნავს, ვის სახელზეც ანთია, ორიანი მაცხოვრის ორბუნებიანობაზე მიანიშნებს, სამიანი წმინდა სამების სიმბოლოა, შანდალი კი, რომელზეც სანთლები წრიულადაა განლაგებული - მარადისობისა."

[marine]

"სანთლის ცვილი ჩვენი კეთილი საქმეების - სულიერი თუ ხორციელი ღვაწლის სახეა, პატრუქი კი - რწმენისა. სანთელი ასევე აღნიშნავს სახარებისეულ ნათელს, ყოველ ადამიანს რომ განანათლებს".

[marine]

"სანთელი ერთ-ერთი უძველესია შესაწირავთა შორის. უფალი იმას კი არ უყურებს, რამდენ სანთელს დაანთებ, არამედ შენი გულის განწყობას აკვირდება, რითაც სანთელს შეიძენ და აანთებ მას".

/წმ. ეპისკოპოსი გაბრიელი (ქიქოძე)/

[marine]

"სანთელი არის სიმბოლო ჩვენი უშრეტი და ცეცხლოვანი რწმენისა. იგი მხოლოდ ამას განასახიერებს ღვთის წინაშე"

/დეკ. შიო პაიჭაძე/

[marine]

"უფალმა ინებოს, რომ სანთლებივით ენთოთ ღვთის წინაშე და კეთილსურნელებას აფრქვევდეთ"

/სქემარქიმანდრიტი ვიტალი (სიდორენკო)/

[marine]

"სანთლები თქვენს ნაცვლად ლოცულობენ"

/სქემარქიმანდრიტი ვიტალი (სიდორენკო)/

[marine]

"მოსეს დადგმულ კარავსა და დავითისა და სოლომონის აგებულ ტაძარში ჯერ სანთლებსა და ლამპრებს აღანთებდნენ და მერე ღმერთს ადიდებდნენ. შემდგომში წმინდა მამებმა სანთლებისა და ლამპრების ანთება ტაძრებშიც განაწესეს, რათა იქ მდგომარე ერის გულში სიწმინდე ისე ანათებდეს, როგორც ანთებული სანთლები".

[marine]

"მილიონი სანთელიც რომ აანთო, ღმერთი ლოცვას არ შეისმენს, თუ ადამიანი გძულს!.."

/მამა პეტრე კვარაცხელია/

[marine]

"ხატის წინ დანთებული სანთელი ასახავს ადამიანის მზადყოფნას ღვთისადმი მორჩილებისათვის, მის ახალ ქმნილებად გადაქცევას, სწრაფვას განღმრთობისაკენ; რომ მისი ამქვეყნიური სიცოცხლე უნდა წააგავდეს ანთებულ სანთელს, რომელიც თვითონ იწვის და სხვას გზას უნათებს".

[marine]

"ახალ აღთქმაში უფლისათვის, ეკლესიისათვის შესაწირი არის ნებაყოფლობითი. არა აქვს მნიშვნელობა რამდენ სანთელს ავანთებთ, კენტს თუ ლუწს, ხელით ჩავაქრობთ თუ შებერვით, ტაძარში დავტოვებთ თუ სახლში წავიღებთ"

[marine]

"შეიძლება სანთლებიც აანთო და ლოცვებით მუხლიც გადაიტყავო, მაგრამ თუ ბოღმა გახრჩობს, ყველაფერი უაზრობაა!.."

/მამა პეტრე კვარაცხელია/

[marine]

"გრიგოლ ხანძთელის კედელხატულს მიუნთო სანთელი"

/ლევან გოთუა/

[marine]

"სანთლები მართალი სარწმუნოების ნათელს გამოხატავს"

[marine]

"რა აზრი აქვს სანთლის ანთებას, თუ არ ცდილობს ადამიანი თავად დაიწვას სანთელივით და სხვას გზა გაუნათოს?"

/მამა თეიმურაზ ქორიძე/

[marine]

"თუ ღვთის ტაძარში მოდიხარ, უპირველესად აანთე სანთელი საკუთარ გულში, დაუნთე ხილულად მეორე, თუ შეძლებ ღმერთს, ანდა - მის წმიდანს და გულმოდგინედ ილოცე, ვიდერე სანთლები იწვიან!"

[marine]

"წმინდა სანთელივით დნება სამშობლოს სამსხვერპლოზე"

[marine]

"ღმერთისთვის უფრო ადვილია ახალი მზის აგიზგიზება ზეცაში, ვიდრე ჩვენთვის - სანთლის ანთება"

[marine]

"სანთელი წვას განაგრძობს, მიუხედავად იმისა, არიან თუ არა იქ ადამიანები; ასევე მორწმუნენი გამუდმებით უნდა აღასრულებდნენ სიკეთეს და არ უნდა ფიქრობდნენ იმის შესახებ, უცქერს თუ არა ვინმე მათ საქმეს".

[marine]

"ადამიანო, შენი ცხოვრება შენ წინაშე იგივეა, რაც სანთელი, რომელიც შენ თვალწინ იწვის. ჩაიწვება სანთელი და ჩაქრება - ასე ამთავრებს ადამიანი თავის სიცოცხლეს და კვდება. სანთელი რომ ჩაქრება, აღმოჩნდება, რომ ის თითქოს არც იყო - ასევე, როცა ადამიანი გარდაიცვლება და დაასაფლავებენ, გგონია, რომ იგი არც იყო.
ხედავ, ადამიანო, რა არის ადამიანი და რა არის მისი ცხოვრება! ამიტომ გახსოვდეს, შენი ცხოვრებაც ასე ჩაქრება, როგორც ხედავ ჩამქრალ სანთელს, და წინასწარ ემზადე საკუთარი აღსასრულისთვის და ნეტარებაში აღესრულები".

/არქიმანდრიტი ლაზარე/