სერბები ახალ პატრიარქს ირჩევენ, დღეს პარამეტრები

[კანონისტი]

დღეს სერბეთის დედაქალაქ ბელგრადში გაიხსნა სამღვდელმთავრო კრება, რომელმაც უნდა აირჩიოს სერბეთის მართლმადიდებელი ეკლესიის 45-ე პატრიარქი. კრებას თავმჯდომარეობს უხუცესი მღვდელმთავარი შაბაჩის მიტროპოლიტი ლავრენტი.

თუ სერბეთის ეკლესიის განაწესში ცვლილებები არ შევა, მაშინ ახალ პატრიარქს სამი კანდიდატისგან კენჭისყრით აარჩევენ. კანდიდატების შერჩევა კი ფარული ხმის მიცემით მოხდება, რომლებსაც ეპისკოპოსები დაასახელებენ. პატრიარქობის კანდიდატი შეიძლება სერბეთის ეკლესიის ნებისმიერი იერარქი გახდეს, რომელიც ეპარქიას მინიმუმ 5 წლის განმავლობაში განაგებდა. ამ მოთხოვნას მღვდელმთავართა კრების წევრი 45 მეუფიდან 37 აკმაყოფილებს.
ახალი პატრიარქის არჩევა ბელგრადის ეპარქიის წმ. სიმეონ მირონმდინარის სახელობის ტაძარში მოხდება. სერბეთის 45-ე პატრიარქის ინტრონიზაცია კი არჩევიდან დაახლოებით ორ დღეში ბელგრადის საკათედრო ტაძარში მოხდება.

სერბეთის პატრიარქი პავლე 96 წლის ასაკში 15 ნოემბერს ბელგრადის საავადმყოფოში გარდაიცვალა. ფილტვებისა და გულთან დაკავშირებული პრობლემების გამო იგი ორი წლის განმავლობაში ბელგრადის სამხედრო ჰოსპიტალში მკურნალობდა. ახალი პატრიარქის არჩევამდე სერბეთის პატრიარქის მოვალეობას ჩერნოგორია-პრიმორიის მიტროპოლიტი ამფილოქე ასრულებდა.