შეკითხვა პარამეტრები

[GIO26]

დამლოცე მამა.
ნაკურთხი ჯვარი დავკარგე, მირჩიეთ როგორ მოვიქცე ძალიან განვიცდი.

გილოცავთ შობას.

[zik_i]

დამლოცეთ მამო.
არ ვარ ღვთის მოსაწონი შვილი, უამრავი ცოდვა მაქვს ჩადენილი დავივიწყე ღვთის სახლიც დიდი ხანია რაც ეკლესიასში არ ვყოფილივარ, როდესაც დავაპირებ
ეკლესიასში წასვლას ყოველთვის რაღაც მიშლის ხელს, და თუ მივედი, დიდი ხანი ვერ ვძლებ. მონასტერში ვიყავი ასული ღვთაებაში მამაომ პარაკლისი გადამიხადა,
ამდროს თურმე ცუდათ გამხდარვარ, იქაც ვერ გავძელი და წამოვედი, როგორ მოვიქცე ეს შებრძოლებები როგორ გადავლახო.

[დეკ. ანდრია]

GIO26
შეიძინეთ ახალი ჯვარი, გიკურთხევთ მოძღვარი და ატარეთ პატივით. დაკარგვისათვის კი, თუ ეს დაუდევრობით მოხდა, ეპიტემიის ტვირთვა მოგიწევთ. ამის თაობაზე შეგიძლიათ გაესაუბროთ იმ მოძღვარს, რომელიც ჯვარს გიკურთხევთ.
------------------------------

zik_i
როცა ადამიანი ინათლება, მას ეწოდება „ახალი მხედარი ქრისტეს ღმრთისა”. სულიერი ცხოვრება – სულიერი ბრძოლაა უკეთურებასთან, ვნებასთან, ცოდვასთან, თვით ეშმაკთან. არ უნდა გვეგონოს, რომ ეს ადვილია. დროდადრო შეიძლება წავაგოთ ცალკეული ბრძოლა, მაგრამ ეს ჯერ კიდევ არ ნიშნავს ომის წაგებას. ეკლესიური ცხოვრებით ადამიანი ეკარგება დემონურ სამყაროს და, ბუნებრივია, რომ ბოროტი ყველანაირად ცდილობს აგვარიდოს ეკლესიას. მაცხოვნებელი ღმრთის მადლია და არა ჩვენი ადამიანური ძალები. მაგრამ ჩვენ უნდა ვეცადოთ უერთგულოთ ღმერთს, ეკლესიას. თხოვეთ უფალს თქვენივე სიტყვებით, რომ შეგაძლებინოთ ეკლესიური ცხოვრება. გადახედეთ განვლილ გზას და ეცადეთ არ ჩატოვოთ გულში მოუნანიებლად თუნდაც უმცირესი ცოდვა. არ შეურიგდეთ ნაკლოვანებას, ნუ იტყვით, რომ ადამიანი ხართ და არა ანგელოზი და გეპატიებათ. ჩვენი მცდელობა – საქმით აღვლენილი ლოცვაა. როცა ძვალსა და რბილში გაგიჯდებათ ადამინური ძალების უსუსურობის განცდა, მოგხედავთ უფალი და შეგაძლებინებთ. მთავარია არ დაკარგოთ იმედი და არ დაყაროთ ფარ-ხმალი.